Angry Birds, Silent Hill va FIFA International Soccer videooʻyinlar shon-shuhrat zaliga kiritildi
AQShning The Strong National Museum of Play muzeyi 2026-yilgi videooʻyinlar shon-shuhrat zaliga kiritilgan yangi loyihalarni eʼlon qildi. Roʻyxatdan Angry Birds, Silent Hill, Dragon Quest va FIFA International Soccer oʻrin oldi. Ushbu oʻyinlar oʻz janrlariga va butun bir avlod oʻyinchilariga katta taʼsir koʻrsatgan loyihalar sifatida eʼtirof etildi. Bu haqda Ixbt.com xabar beradi.
Rovio studiyasining Angry Birds oʻyini roʻyxatdagi eng ommabop loyiha boʻldi. 2009-yilda chiqarilgan ushbu oʻyin mobil sanoatda global fenomenga aylandi. Millionlab foydalanuvchilar qushlarni rogatkadan otib, choʻchqalar istehkomlarini vayron qilishdi. Keyinchalik bu brend smartfonlar doirasidan chiqib, filmlar va oʻyinchoqlar ishlab chiqarish darajasiga yetdi.
Konami kompaniyasining Silent Hill dahshatli oʻyini psixologik xorror janrini shakllantirgani uchun taqdirlandi. Oʻyin oʻzining tumanli shahri va doimiy noqulaylik hissini uygʻotuvchi atmosferasi bilan mashhur boʻldi. Shuningdek, 1986-yilda chiqqan yapon RPG loyihasi Dragon Quest zamonaviy rolli oʻyinlar shablonini yaratishda muhim rol oʻynadi.
Electronic Arts kompaniyasining FIFA International Soccer oʻyini esa dunyodagi eng yirik futbol oʻyinlari seriyasiga asos soldi. Garchi kompaniya endilikda FIFA litsenziyasidan foydalanmay, oʻyinni EA Sports FC deb nomlagan boʻlsa-da, aynan ushbu ilk loyiha sport simulyatorlari uchun poydevor boʻlib xizmat qildi. Yangi gʻoliblar 49 ta kult oʻyindan iborat mavjud kolleksiyaga qoʻshildi.
“Zamin”ni Telegramʻda oʻqing!
