Uber uzoq vaqtdan beri shunchaki taksi xizmati emas, balki foydalanuvchilarning kundalik ehtiyojlarini qondiradigan "super ilova"ga aylanishni maqsad qilgan. Waymo kabi avtonom transport kompaniyalarining faollashuvi Uber'ni bu borada yanada tezroq harakat qilishga undamoqda. Kompaniya o‘z platformasini nafaqat transport, balki turizm va xaridlar uchun ham markaziy nuqtaga aylantirishga intilmoqda. Bu haqda Techcrunch.com xabar beradi.
Nyu-Yorkda bo‘lib o‘tgan GO-GET tadbirida Uber Expedia Group bilan hamkorlikda mehmonxonalarni bron qilish xizmatini ishga tushirganini e’lon qildi. Endilikda foydalanuvchilar 700 mingdan ortiq turar joylarni to‘g‘ridan-to‘g‘ri ilova orqali tanlashlari mumkin. Uber One obunachilari esa maxsus chegirmalar va keshbek tizimidan foydalanish imkoniyatiga ega bo‘lishadi.
Uber texnik direktori Praveen Neppalli Naga kompaniyaning strategiyasi aynan obunachilik modeliga asoslanganini ta’kidladi. Uning so‘zlariga ko‘ra, transport, ovqat yetkazib berish va mehmonxona xizmatlarini birlashtirish foydalanuvchilar uchun yagona ekotizimni yaratadi. Kelgusida parvozlar va moliyaviy xizmatlarni ham ilovaga integratsiya qilish rejada bor.
Biroq, bu yo‘lda raqobat kuchli. Airbnb transport xizmatlarini rivojlantirib, Uber'ga javob qaytarmoqda, Elon Musk esa X platformasini "hamma narsa uchun ilova"ga aylantirish ustida ishlamoqda. AQSh bozorida foydalanuvchilarni bitta ilovada ushlab qolish qiyin vazifa, chunki har bir yo‘nalish bo‘yicha allaqachon o‘z yetakchi ilovalari mavjud.
Uber'ning asosiy ustunligi — uning 199 millionlik faol foydalanuvchilar bazasi va ularning to‘lov ma’lumotlari allaqachon tizimda mavjudligidir. Uber Eats'ning jadal o‘sishi kompaniyaning ushbu strategiyasi to‘g‘ri ekanligini ko‘rsatmoqda. Endilikda kompaniya o‘z foydalanuvchilarini yangi ilovalar yuklab olishdan xalos etib, barcha xizmatlarni bitta platformada taqdim etishga harakat qilmoqda.
“Zamin”ni Telegramʻda oʻqing!
