Linux operatsion tizimi o‘yinlar uchun mo‘ljallangan to‘laqonli ekotizimga aylanishda davom etmoqda. Shu maqsadda ishlab chiquvchilar Windows tizimining ayrim mexanizmlarini to‘g‘ridan-to‘g‘ri Linux yadrosiga ko‘chirishni boshladilar. Buning asosiy qismi sifatida NTSYNC drayveri joriy etildi, u Steam Deck qurilmalarida sukut bo‘yicha faollashtirilgan. Bu haqda Ixbt.com xabar beradi.
Ilgari Windows o‘yinlarini Linux'da ishga tushirish uchun Wine va Proton kabi moslik qatlamlaridan foydalanilar edi. NTSYNC texnologiyasi esa o‘yinlarga kerakli bo‘lgan sinxronizatsiya jarayonlarini yadro darajasida amalga oshiradi. Bu o‘yinlardagi fizikaviy hisob-kitoblar, audio va sun’iy intellekt kabi parallel vazifalarni bajarishda samaradorlikni sezilarli darajada oshiradi.
Yangi yechim o‘yinlarning Windows tizimidagi kabi ishlashini ta’minlaydi. Garchi dastlabki testlarda FPS ko‘rsatkichlarining keskin o‘sishi kuzatilgan bo‘lsa-da, mutaxassislar asosiy yutuq unumdorlikdan ko‘ra barqarorlikda ekanligini ta’kidlashmoqda. NTSYNC tasodifiy qotib qolishlar va tizimli xatolarni bartaraf etib, o‘yin tajribasini yanada silliq qiladi.
Ushbu o‘zgarishlarning asosiy harakatlantiruvchi kuchi Valve kompaniyasi hisoblanadi. Steam Deck platformasining muvaffaqiyati va Windows 10 qo‘llab-quvvatlanishining yakunlanishi Linux'ning o‘yin bozoridagi ulushini oshirmoqda. Hozirda Linux nafaqat Windows ilovalarini moslashtiruvchi muhit, balki mustaqil o‘yin platformasi sifatida ham rivojlanmoqda.
“Zamin”ni Telegramʻda oʻqing!
