Microsoft kompaniyasining Keniyada barpo etilishi rejalashtirilgan yirik maʼlumotlar markazi loyihasi moliyaviy kafolatlar boʻyicha kelishmovchiliklar sababli toʻxtab qoldi. Bloomberg agentligi xabariga koʻra, Microsoft va uning hamkori G42 kompaniyasi Keniya hukumati bilan hisob-kitoblar boʻyicha murosaga kela olmagan. Bu haqda Ixbt.com xabar beradi.
Tomonlar oʻrtasidagi asosiy ziddiyat davlat tomonidan xarid qilinishi kerak boʻlgan hisoblash quvvatlari uchun kafolatlangan yillik toʻlovlar sxemasi atrofida yuzaga keldi. Keniya hukumati Microsoft taklif qilgan moliyaviy shartlarni qabul qilishdan bosh tortdi.
Eslatib oʻtamiz, 2024-yilning may oyida tomonlar Sharqiy Afrikada bulutli infratuzilmani kengaytirish maqsadida 1 milliard dollarlik sarmoya kiritish boʻyicha kelishuvga erishgan edi. Loyiha geotermal energiya asosida ishlaydigan va Azure bulutli platformasiga ulangan zamonaviy markazni qurishni koʻzda tutgan edi.
Hozirgi vaqtda muzokaralar butunlay toʻxtatilmagan boʻlsa-da, loyihaning koʻlami qayta koʻrib chiqilishi mumkin. Keniya rasmiylari muloqot davom etayotganini va energiya isteʼmoli hamda markaz konfiguratsiyasi kabi muhim parametrlar hali ham kelishuv bosqichida ekanligini taʼkidlamoqda.
“Zamin”ni Telegramʻda oʻqing!
