Nihoyat, Android va iPhone foydalanuvchilari oʻrtasidagi yozishmalar uchun oxirigacha shifrlash (end-to-end encryption) funksiyasi joriy etilmoqda. Dushanba kunidan boshlab, eng soʻnggi dasturiy taʼminotga ega qurilmalar uchun ushbu xavfsizlik texnologiyasi beta-test rejimida ishga tushirildi. Bu haqda Techcrunch.com xabar beradi.
Oxirigacha shifrlash foydalanuvchi maxfiyligini taʼminlashda muhim ahamiyatga ega. Bu texnologiya xabarlarni uzatish jarayonida ularni himoyalangan kodga aylantiradi, natijada xakerlar, davlat idoralari yoki aloqa platformalari egalari ham yozishmalarni oʻqiy olmaydi. Ilgari iMessage va Android tizimlari oʻrtasida bunday himoya mavjud emas edi.
Apple kompaniyasi uzoq vaqt davomida RCS standartini qoʻllab-quvvatlashdan bosh tortib kelgan edi. Biroq, tartibga soluvchi organlarning bosimi va Google kompaniyasining saʼy-harakatlari bilan Apple 2023-yilda ushbu standartga oʻtishga rozi boʻldi. RCS texnologiyasi yozishmalarda matn hajmini oshirish, reaksiya bildirish va oʻqilganlik holatini koʻrsatish kabi imkoniyatlarni taqdim etadi.
Ushbu yangilik "yashil" va "koʻk" pufakchalar oʻrtasidagi tafovutni kamaytiradi. Hozirda funksiya beta-bosqichda boʻlgani uchun barcha foydalanuvchilarga yetib bormagan boʻlishi mumkin. Agar suhbat shifrlangan boʻlsa, foydalanuvchilar chat oynasida maxsus qulf belgisini koʻrishlari mumkin.
“Zamin”ni Telegramʻda oʻqing!
