Kaliforniya politexnika universiteti olimlari magnit maydonini vaqt o‘tishi bilan boshqariladigan tarzda o‘zgartirish orqali kvant materiyasining mutlaqo yangi holatlarini yaratish mumkinligini aniqladilar. Ushbu tadqiqot kvant fizikasining Floke-injeneriya yo‘nalishiga asoslangan bo‘lib, unda material xossalari nafaqat uning tarkibi, balki tashqi davriy ta’sirlar orqali ham shakllantiriladi. Bu haqda Ixbt.com xabar beradi.
Tadqiqotchilar magnit maydonini ma’lum bir ssenariy bo‘yicha davriy ravishda o‘zgartirib, tizimni «silkitish» orqali statik materiyada uchramaydigan barqaror kvant fazalarini hosil qilishga erishdilar. Bu usul kvant materiallarining xossalarini ularning ichki tuzilmasi bilan birga, vaqt o‘tishi bilan qanday o‘zgarishiga qarab boshqarish imkonini beradi.
Ushbu kashfiyotning eng muhim jihati shundaki, yangi hosil qilingan kvant holatlari shovqin va xatolarga nisbatan yuqori chidamlilikka ega. Bu zamonaviy kvant kompyuterlari uchun eng katta muammo hisoblangan kubitlarning barqarorligini ta’minlashda muhim qadam bo‘lishi mumkin.
Olimlar, shuningdek, yuqori o‘lchamli tizimlarga xos bo‘lgan matematik qonuniyatlarni oddiyroq qurilmalarda kuzatishga muvaffaq bo‘lishdi. Bu esa murakkab kvant jarayonlarini o‘rganish uchun qulay modellar yaratish imkonini beradi.
Kelajakda ushbu natijalar kvant hisoblash texnologiyalari, yangi turdagi elektronika va foton qurilmalarini rivojlantirishda qo‘llanilishi kutilmoqda. Tadqiqot mualliflari navbatdagi bosqich sifatida ushbu nazariyani o‘ta sovuq atomlar yordamida eksperimental tarzda tasdiqlashni rejalashtirmoqdalar.
“Zamin”ni Telegramʻda oʻqing!
