Anthropic kompaniyasi Claude Managed Agents platformasi uchun Dreaming deb nomlangan yangi tizimni taqdim etdi. Ushbu texnologiya sunʼiy intellekt agentlariga oʻz tajribasini mustaqil tahlil qilish, oʻtmishdagi xatolardan saboq olish va kelgusi vazifalarda samaradorlikni oshirish imkonini beradi. San-Fransiskodagi Code with Claude konferensiyasida namoyish etilgan ushbu yechim modelni qayta oʻqitmasdan, agentlarning oʻzini oʻzi tuzatish qobiliyatini rivojlantirishga qaratilgan. Bu haqda Ixbt.com xabar beradi.
Dreaming tizimi oddiy xotiradan farqli oʻlaroq, "uyqu rejimi"da ishlaydigan alohida jarayon sifatida faoliyat yuritadi. Tizim oʻtgan sessiyalarni tahlil qilib, takrorlanuvchi xatolar va muvaffaqiyatli yechimlarni aniqlaydi hamda ularni kelgusi ishlar uchun strukturaviy yoʻriqnomalarga aylantiradi. Anthropic tadqiqotchisi Aleks Albertning taʼkidlashicha, bu jarayon insonning professional tajriba orttirishiga oʻxshaydi, bunda agent oʻzi uchun maxsus "pleybuk"lar yaratadi.
Kompaniya shuningdek, Outcomes va Multi-Agent Orchestration texnologiyalarini ham taqdim etdi. Outcomes agentlarga oʻz ishini belgilangan sifat mezonlari asosida avtomatik tekshirish imkonini bersa, Multi-Agent Orchestration murakkab vazifalarni bir nechta ixtisoslashgan agentlar oʻrtasida taqsimlashga yordam beradi. Bu yondashuv uzoq davom etadigan sessiyalarda sifat pasayishining oldini olishga xizmat qiladi.
Anthropic bosh direktori Dario Amodei kompaniya oʻsishi kutilganidan ancha yuqori boʻlganini va yillik daromad 80 barobarga oshganini maʼlum qildi. Hisoblash quvvatlariga boʻlgan talabni qondirish maqsadida kompaniya SpaceX bilan hamkorlikda Colossus maʼlumotlar markazi orqali infratuzilmani kengaytirmoqda.
“Zamin”ni Telegramʻda oʻqing!
