Xiaomi kompaniyasi kutilmaganda ishlab chiqarishdan olingan va dasturiy ta’minotni qo‘llab-quvvatlash muddati tugagan Xiaomi, Redmi hamda Poco smartfonlari uchun HyperOS yangilanishini taqdim etdi. Ushbu yangilanish tizimdagi muhim xatolarni bartaraf etish va qurilmalar barqarorligini oshirishga qaratilgan. Bu haqda Ixbt.com xabar beradi.
Odatda, qurilma EOL (End of Life) ro‘yxatiga kiritilgach, u uchun operatsion tizim yoki xavfsizlik yangilanishlari to‘xtatiladi. Biroq, Xiaomi o‘z foydalanuvchilarini himoya qilish maqsadida, hatto rasmiy qo‘llab-quvvatlash muddati tugagan modellarga ham vaqti-vaqti bilan muhim tuzatishlarni yuborishda davom etmoqda.
Ushbu yangilanishlar smartfonlarning xavfsizligini ta’minlash va kritik muammolarni hal qilish uchun xizmat qiladi. Garchi bu yangi funksiyalarni qo‘shmasa ham, eski qurilmalarning ishlash muddatini uzaytirishda muhim ahamiyat kasb etadi.
Foydalanuvchilar o‘z qurilmalarida yangilanish mavjudligini tekshirish uchun smartfon sozlamalari menyusiga kirib, tizim yangilanishlari bo‘limini tekshirib ko‘rishlari tavsiya etiladi.
“Zamin”ni Telegramʻda oʻqing!
