Kiberxavfsizlik bo‘yicha mutaxassislar Samsung Galaxy S26 va Galaxy S26 Plus modellarining himoyasini buzishga muvaffaq bo‘lishdi. Exynos 2600 protsessorida ishlovchi ushbu qurilmalarda root-huquqlarini qo‘lga kiritish va Magisk dasturini ishga tushirish imkoniyati paydo bo‘ldi. Bu haqda Ixbt.com xabar beradi.
DarkNavy jamoasi tomonidan e’lon qilingan videoda ushbu jarayon muvaffaqiyatli amalga oshirilgani namoyish etildi. Ta’kidlash joizki, Galaxy S26 Ultra modeli bu ro‘yxatga kirmaydi, chunki u Qualcomm Snapdragon 8 Elite Gen5 for Galaxy chipida ishlaydi.
Android Authority ma’lumotlariga ko‘ra, bu Samsung kompaniyasi One UI 8 tizimida yuklagichni (bootloader) qulfdan chiqarish imkoniyatini olib tashlaganidan keyin Exynos versiyalaridagi ilk muvaffaqiyatli holat hisoblanadi. Mutaxassislar oddiy ilova yordamida zaiflikdan foydalanib, Magisk tizimini o‘rnatishga erishgan.
Hozircha mazkur zaiflikning texnik tafsilotlari, jumladan, uning qaysi proshivka versiyalariga taalluqli ekani va qanday ishlashi sir tutilmoqda. Kompaniya ushbu xavfsizlik bo‘shlig‘ini kelgusi yangilanishlarda yopishi kutilmoqda.
“Zamin”ni Telegramʻda oʻqing!
