NASA’ning Perseverance marsxodi Marsdagi qadimiy landshaft fonida o‘zining navbatdagi selfi suratini taqdim etdi. 61 ta alohida tasvirni birlashtirish orqali olingan ushbu surat 2026-yil 11-martda, missiyaning 1797-kunida, Yezero kraterining g‘arbiy qismida amalga oshirildi. Bu haqda Ixbt.com xabar beradi.
Hozirda Perseverance o‘zining beshinchi ilmiy kampaniyasi doirasida Lac de Charmes deb nomlangan hududni tadqiq qilmoqda. Olimlarning ta’kidlashicha, bu yerda krater shakllanishidan oldin paydo bo‘lgan qadimiy vulqon jinslari mavjud. Ushbu hudud marsxod qo‘nganidan buyon yetib borgan eng g‘arbiy nuqta hisoblanadi.
Tadqiqotlar davomida Arethusa hududidan topilgan magmatik minerallar Marsning geologik o‘tmishini tushunishda muhim ahamiyat kasb etadi. Shuningdek, Mastcam-Z kamerasi yordamida olingan panoramali suratlar 3,9 milliard yil avvalgi meteorit zarbasi natijasida hosil bo‘lgan ulkan tosh parchalarini namoyish etadi.
Besh yildan ortiq vaqt davomida Perseverance qariyb 42 kilometr masofani bosib o‘tdi, bu esa deyarli marafon masofasiga teng. NASA mutaxassislari marsxodning texnik holati a’lo darajada ekanligini va u endilikda «ultramarafon» bosqichiga tayyorgarlik ko‘rayotganini ma’lum qildi.
“Zamin”ni Telegramʻda oʻqing!
