Tecno brendi Rossiya bozorida yangi Megabook S16 noutbukini sotuvga chiqarganini e'lon qildi. Kompaniya vakillarining ta'kidlashicha, ushbu qurilma mobillik va yuqori unumdorlikni qadrlaydigan mutaxassislar hamda ijodkorlar uchun mo‘ljallangan yengil va quvvatli yechim hisoblanadi. Bu haqda Ixbt.com xabar beradi.
Noutbuk korpusi magniy-alyuminiy qotishmasidan tayyorlangan bo‘lib, 16 dyuymli ekranga ega bo‘lishiga qaramay, uning og‘irligi atigi 1299 grammni, qalinligi esa 14,9 millimetrni tashkil etadi. Displey 1920x1200 pikselli FHD ruxsatiga va 16:10 nisbatiga ega.
Qurilma Intel Core i9-13900HK protsessori, 16 GB LPDDR5 operativ xotira va 1 TB hajmli PCIe 3.0 SSD bilan jihozlangan. 75 Vt·soat sig‘imli akkumulyator uzoq vaqt ishlash imkonini beradi. Shuningdek, noutbukda DTS:X Ultra texnologiyasiga ega dinamiklar, yoritiladigan klaviatura va barmoq izi skaneri mavjud.
Tecno AI «Yordamchi» funksiyasi yig‘ilishlar mazmunini avtomatik tarzda qisqacha bayon qilib beradi, «Galereya» sun'iy intellekti esa smartfondagi suratlarni sinxronlashtiradi. Tecno «PC Manager» ilovasi esa fayllarni tezkor uzatish va umumiy buferdan foydalanish imkonini yaratadi. Noutbukning narxi 96 ming rublni tashkil etadi.
“Zamin”ni Telegramʻda oʻqing!
