Xitoy avtomobil bozori tarixiy ko‘rsatkichni qayd etdi: 2026-yilning aprel oyida yangi energiya manbalarida ishlaydigan avtomobillar (NEV) ulushi ilk bor 60 foizdan oshib, 61,4 foizga yetdi. Xitoy yengil avtomobillar assotsiatsiyasi ma’lumotlariga ko‘ra, mamlakatda eng ko‘p sotilgan o‘nta model ichida ichki yonuv dvigatelli (DVS) atigi bitta avtomobil qoldi. Bu haqda Ixbt.com xabar beradi.
Sotuvlar bo‘yicha yetakchi Geely Xingyuan (Geely Galaxy EX2) bo‘lib, u 34 727 dona nusxada sotilgan. Undan keyingi o‘rinlarni Xiaomi SU7 va Tesla Model Y egalladi. Top-10 ro‘yxatidagi yagona benzinli avtomobil Geely Coolray bo‘lib, u 14 923 dona ko‘rsatkich bilan sakkizinchi o‘rinni band etdi. Taqqoslash uchun, yetakchi model benzinli raqibidan qariyb 2,3 barobar ko‘proq xaridor topgan.
DVS avtomobillari uchun vaziyat keskin yomonlashmoqda. Yanvar oyida o‘ntalikning yettitasi benzinli modellar bo‘lgan bo‘lsa, mart oyida bu ko‘rsatkich beshtaga tushgandi. Hozirda bozor deyarli to‘liq elektromobillar va gibridlar nazoratiga o‘tdi. Aprel reytingidan BYD, Li Auto va Leapmotor modellari ham o‘rin oldi.
Umumiy hisobda aprel oyida Xitoyda 1,384 millionta yengil avtomobil sotilgan, bu o‘tgan yilga nisbatan 21,5 foizga kam. Biroq, NEV segmentidagi pasayish atigi 6,8 foizni tashkil etgan bo‘lsa, benzinli avtomobillar savdosi 37 foizga quladi. Tahlilchilar ushbu o‘zgarishni yoqilg‘i narxlarining qimmatligi va xaridorlarning elektr transportiga bo‘lgan ishonchi ortgani bilan izohlamoqda.
“Zamin”ni Telegramʻda oʻqing!
