Uch yillik tarixga ega Mach Industries kompaniyasi 50 million dollarlik naqd pul va aksiyalar evaziga qattiq yoqilgʻili raketa dvigatellari ishlab chiqaruvchi Exquadrum startapini sotib oldi. Endilikda Mach Energetics deb nomlanayotgan ushbu korxona Mach tarkibiga toʻliq qoʻshildi, bu esa kompaniyaga zamonaviy uchuvchisiz tizimlarning eng muhim va taqchilligi sezilayotgan qismlaridan biri ustidan bevosita nazorat oʻrnatish imkonini beradi. Bu haqda Techcrunch.com xabar beradi.
Kompaniya asoschisi va bosh direktori Ethan Thorntonning taʼkidlashicha, vertikal integratsiya mudofaa sanoati uchun zaruriy qadamdir. Hozirgi kunda Aerojet Rocketdyne va Northrop Grumman kabi yirik oʻyinchilar hukmronlik qilayotgan bozorda qattiq yoqilgʻili raketa dvigatellarini yetkazib berishdagi uzilishlar jiddiy muammoga aylangan. Mach Industries ushbu komponentlarni nafaqat oʻz loyihalari uchun, balki butun mudofaa ekotizimi uchun ishlab chiqarishni maqsad qilgan.
Bitim doirasida Exquadrumʼning 85 nafar xodimi, uning intellektual mulki va Kaliforniyadagi 70 ming kvadrat futlik sinov markazi Mach ixtiyoriga oʻtdi. Shu tariqa, birlashgan kompaniya xodimlari soni 350 nafarga yetdi. Exquadrum asoschilari Kevin Mahaffy va Eric Schmidt esa Mach Energetics tarkibida rahbarlik lavozimlarini egallashdi.
Mach Industries hozirda Viper, Glide, Stratos, Dart va Pike kabi beshta turli uchish apparatlari dasturlari ustida ishlamoqda. Ulardan kamida uchtasini joriy yilda ishlab chiqarishga kiritish rejalashtirilgan. Umumiy qiymati 470 million dollarga baholanayotgan kompaniya, ushbu xarid orqali oʻz mahsulotlarining tannarxini optimallashtirish va ishlab chiqarish surʼatlarini tezlashtirishni koʻzlamoqda.
“Zamin”ni Telegramʻda oʻqing!
