Oʻn yillar davomida texnologiya sanoatining geografiyasi oʻzgarmasdek tuyulardi va Silikon vodiysi global startap iqtisodiyotida mutlaq hukmronlik qilib keldi. London, Pekin va Tel-Aviv kabi shaharlar ikkinchi darajali taʼsir doirasi uchun kurashayotgan bir paytda, sunʻiy intellekt (AI) sohasidagi eng muhim jarayonlar butunlay boshqa joyda — Parijda sodir boʻlmoqda. Fransiya AI tadqiqotlari va infratuzilmasiga tajovuzkorona sarmoya kiritmoqda, Mistral AI kabi startaplar esa Yevropaning ushbu global poygada haqiqiy kuchga aylanishiga yordam bermoqda. Bu haqda Techcrunch.com xabar beradi.
Yevropaning startap ekotizimi sezilarli darajada yetildi; endilikda asoschilar oʻz kompaniyalarini darhol AQSHga koʻchirish oʻrniga, ularni oʻz mamlakatida kengaytirishga koʻproq intilmoqda. Parijning oʻsib borayotgan taʼsiri nafaqat startaplar bilan cheklanadi. Shaxar siyosatchilar, korporativ rahbarlar, investorlar va tadqiqotchilar uchun sunʻiy intellektning keyingi davri qanday boʻlishi kerak degan savolga javob izlaydigan asosiy uchrashuv nuqtasiga aylandi.
Bunga isbot sifatida har yili oʻtkaziladigan VivaTech anjumanini koʻrsatish mumkin. Ushbu tadbir mintaqaviy koʻrgazmadan dunyodagi eng nufuzli AI va innovatsiya tadbirlaridan biriga aylandi. VivaTech evolyutsiyasi soʻnggi bir necha yil ichida AI sanoatidagi oʻzgarishlarni aks ettiradi. Agar bir yil avval asosiy eʼtibor chatbotlar va ChatGPT kabi vositalarga qaratilgan boʻlsa, endilikda diqqat markazida infratuzilma, kiberxavfsizlik va sunʻiy intellektni yirik tashkilotlarga integratsiya qilish masalalari turibdi.
TechCrunch va VivaTech oʻrtasidagi hamkorlik ham ushbu tadbirning global ekotizimdagi nufuzi oshib borayotganidan dalolat beradi. Hamkorlik doirasida VivaTech Innovation of the Year tanlovi gʻoliblari Parijda oʻz loyihalarini taqdim etish va San-Fransiskodagi TechCrunch Disrupt 2026 koʻrgazmasida ishtirok etish imkoniyatini qoʻlga kiritadilar. Bu esa Parij endi shunchaki rivojlanayotgan texnologik markaz emas, balki global AI muloqotining markaziy nuqtasi ekanini tasdiqlaydi.
VivaTech 2026 koʻrgazmasida Parij sunʻiy intellektning keyingi bosqichini shakllantirish huquqi endi faqat Silikon vodiysiga tegishli emasligini butun dunyoga namoyish etishni maqsad qilgan. Investorlar va siyosatchilarning aynan shu yerda jamlanishi texnologik kelajakning yangi qutbi shakllanganini anglatadi.
“Zamin”ni Telegramʻda oʻqing!
