Сурхондарёда бозор ичида қотиллик: 5 киши пичоқлаган

Сурхондарё вилоятида жамоат жойи — бозор ҳудудида содир этилган ваҳшиёна қотиллик кенг жамоатчиликда катта норозилик ва хавотир уйғотди. Ижтимоий тармоқларда тарқалган видеолавҳалар ва хабарларда айтилишича, эркак киши ўз рафиқаси кўз ўнгида беш киши томонидан пичоқлаб ўлдирилган.

Ушбу ҳолат юзасидан Сурхондарё вилоят прокуратураси расмий ахборот берди. Қайд этилишича, фожеа Шўрчи туманида содир бўлган ва ҳолат юзасидан Жиноят кодексининг 97-моддаси (қасддан одам ўлдириш) бўйича жиноят иши қўзғатилган. Тергов доирасида икки нафар шахс ҳибсга олинган ва уларга нисбатан қамоққа олиш эҳтиёт чораси қўлланган.

Ҳуқуқни муҳофаза қилувчи органларнинг маълум қилишича, марҳумнинг турмуш ўртоғи терговчиларга берган кўрсатмасида қотиллар оила аъзоларига таниш бўлганини, улар илгари бир неча бор таҳдид қилганини айтган. Айни пайтда тергов ишлари давом этмоқда. Жиноят иши Сурхондарё вилоят прокуратураси томонидан шахсан назоратга олинган.

Бу фожиали воқеа ортидан мамлакатнинг бошқа ҳудудларида ҳам шунга ўхшаш жиноятлар юз бераётгани қайд этилди:
• Сурхондарёнинг бошқа туманида эркак қайнукаси томонидан пичоқланган.
• Самарқандда 70 ёшли эркак 60 ёшли қайнукасини пичоқлаган.
• Бухорода эр жанжал сабаб рафиқасини пичоқлаган.
• Жиззахда эркак рашк оқибатида аввал хотинини, сўнг ўзини пичоқлаб ўлдирган.
• Вобкентда эса маст эркак қайнукасини пичоқлаган.

Бундай жиноятларнинг ортиб бораётгани оилавий муносабатлар ва жамият ички мувозанатида жиддий муаммолар борлигини кўрсатмоқда. Жиноий ҳаракатларнинг очиқ жамоат жойларида рўй бераётгани ҳолатнинг қанчалик хавфли тус олаётганидан дарак беради.

Замонавий жамиятда зиддият ва агрессияни зўравонлик билан ҳал қилиш урф бўлиши огоҳликка чорлайди. Қонун олдида жазога тортилиш муқаррар бўлиши, ҳар қандай зўравонлик ҳолатлари жиддий баҳоланиб, тегишли жавобгарлик юклатилиши зарур.

Бугун шахсий, оилавий ва ижтимоий муносабатларда соғлом мулоқот, ҳурмат, сабр ва руҳий мувозанат энг муҳим қадриятлардан бири бўлиб қолмоқда. «Замин»ни Telegram’да ўқинг!