Президент Шавкат Мирзиёев 14 август куни чиқиндиларни қайта ишлашни кенгайтириш ва соҳада самарадорликни ошириш чора-тадбирларига бағишланган тақдимот билан танишди. Мулоқотда чиқиндиларни йиғиш, ташиш ва қайта ишлаш тизимини янгилаш зарурлиги таъкидланди. Мамлакатда аҳоли турмуш сифати ва экологик ҳолатни яхшилаш мақсадида янги ечимлар жорий этилиши маълум қилинди.
Масъуллар маълумотига кўра, маиший чиқиндиларнинг қарийб тўртинчи қисми қоғоз, пластик, резина, шиша ва тўқимачилик қолдиқларидан иборат. Ушбу хомашё турларини қайта ишлаш орқали йилига камида 1 триллион сўмлик маҳсулот ишлаб чиқариш имконияти борлиги айтиб ўтилди. Бу йўналишда хусусий сектор ва хорижий сармоядорлар иштирокини кенгайтириш режалаштирилган.
Шу билан бирга, қурилиш, кимё, электрон қурилмалар ва техник мойлар каби қайта ишланмайдиган чиқиндилар бўйича ҳам катта захира мавжудлиги қайд этилди. Уларни қайта ишлаш технологияларини жорий этиш орқали иш ўринлари яратиш ва иқтисодий самарадорликни ошириш мумкинлиги таъкидланди.
Чиқиндиларни олиб кетиш хизмати аҳолини тўлиқ қониқтириши лозимлиги алоҳида қайд этилди. Шу мақсадда ҳар бир маҳаллада чиқинди техникасининг келиши ва ҳаракатини онлайн тарзда кузатиш имкониятини яратиш вазифаси қўйилди. Бу орқали аҳоли вақти тежалиши ва хизмат сифати ошиши кутилаётгани маълум қилинди.
Шунингдек, ижтимоий муассасалар ва маҳаллаларни зарурий чиқинди контейнерлари билан тўлиқ таъминлаш бўйича икки йиллик дастур ишлаб чиқилиши белгиланди. Ёшларда экологик маданиятни болалар боғчасидан бошлаб шакллантириш, ўқув дастурларига атроф-муҳит муҳофазасига оид мавзуларни киритиш зарурлиги айтилди.
«Замин»ни Telegram’да ўқинг!
