Бугун мамлакатимизда улуғ ва қутлуғ сана — Мустақиллик байрамига бағишланган асосий маросимлар ўтказилади. Тантаналар давлатимиз раҳбари Шавкат Мирзиёев иштирокида юртимиз тарихида муҳим аҳамиятга эга рамзий жойларда старт олади.
Аввало, Президентимиз анъанага кўра Шаҳидлар хотираси хиёбонида бўлиб, мустабид тузум қурбонларини ёдга олади ҳамда улар хотирасига эҳтиром билан чуқур ҳурмат изҳор қилади. Шунингдек, “Янги Ўзбекистон” боғида барпо этилган Мустақиллик монументи пойдеворига гулчамбар қўйиш маросими ҳам амалга оширилади. Бу ўтмишга ҳурмат ва келажакка ишонч рамзи сифатида алоҳида маънога эга.
Куннинг иккинчи ярмида байрам тадбирлари янада кенг кўламда давом этади. Хусусан, кечқурун мамлакатимиз мустақиллигининг 34 йиллигига бағишланган бош тантана бўлиб ўтади. Унда Президент Шавкат Мирзиёев халқимизга самимий табрик сўзлари билан мурожаат қилиши ва барча юртдошларимизни улуғ айём билан қутлашини кутмоқдамиз.
Мазкур маросимлар, шубҳасиз, нафақат халқимизда юксак руҳий кўтаринкилик уйғотади, балки мустақиллик қадриятларини янада асраб-авайлаш ва унинг моҳиятини кенг ёритишга хизмат қилади. Бугунги кун юртимиз тарихида яна бир ёрқин саҳифа сифатида ёдда қолиши аниқ.
«Замин»ни Telegram’да ўқинг!
