Ўзбекистонда аҳоли учун давлат хизматларидан фойдаланиш жараёнлари янада енгиллашмоқда. Адлия вазирлиги хабарига кўра, 2025 йил 1 ноябрдан бошлаб фуқаролар зарур маълумотларни қоғоз кўринишида эмас, балки ўз мобил телефони ёки шахсий кабинети орқали тақдим этишлари мумкин бўлади. Давлат органлари ва ташкилотлари эндиликда маълумотларни қоғоз шаклида талаб қилишга ҳақли эмас.
Янги тартибга мувофиқ, Давлат хизматлари портали орқали тақдим этилган маълумотлар қоғоз ҳужжатларга тенг кучга эга бўлади. Бу, ўз навбатида, фуқаролар учун вақт ва харажатларни тежаш имконини яратади. Жисмоний шахсларнинг шахсий маълумотлари уларнинг шахсий кабинети орқали реал вақт режимида тақдим этилади.
Шу билан бирга, давлат хизматлари марказларида инсонпарварлик тамойиллари асосида янги қулайликлар жорий этилади. Хусусан, нафақахўрлар, ҳомиладор аёллар ва уч ёшгача бўлган фарзанди билан келган фуқаролар навбатсиз хизмат олиш ҳуқуқига эга бўлади. Бу уларнинг давлат хизматларидан тез ва ортиқча қийинчиликсиз фойдаланишларига хизмат қилади.
Янги ислоҳотлардан яна бири — шахсни идентификация қилиш жараёнида инновацион технологиялар жорий этилиши. 2025 йилдан бошлаб ягона идентификация тизими (OneID) орқали рўйхатдан ўтишда Face ID орқали биометрик тасдиқдан ўтиш имконияти яратилади. Бу нафақат хавфсизликни оширади, балки жараённи ҳам анча соддалаштиради.
Шунингдек, Давлат хизматлари марказлари Ягона портал орқали амалга оширилаётган барча хизматлар бўйича аҳоли ва тадбиркорларга хизмат кўрсатиш ҳуқуқини олади. Бу эса давлат хизматларини “бир дарча” тамойили асосида янада самарали ва қулай тарзда тақдим этилишига олиб келади.
Мутасаддилар таъкидлашича, мазкур янгиликлар фуқаролар учун ортиқча қоғозбозликка чек қўйиб, замонавий рақамли хизматларни янада оммалаштиришга қаратилган. Янги тизим амалиётга тўлиқ жорий этилгандан сўнг, аҳоли давлат хизматларидан фойдаланишда кўпроқ қулайлик ва шаффофликка эришади.
«Замин»ни Telegram’да ўқинг!
