“Тошкент шаҳрида экологик вазиятни яхшилаш бўйича кечиктириб бўлмайдиган чора-тадбирлар тўғрисида”ги Президент фармонига кўра, қурилиш учун ажратилган майдонлар мажбурий тартибда комплекс текширувдан ўтказилади.
Хусусан, Тошкент шаҳридаги 500 кв.м ва ундан ортиқ майдонларда қуйидаги талаблар бўйича баҳолаш ўтказилади: майдоннинг камида 25 фоизи кўкаламзор бўлиши, сув пуркагичлар ўрнатилиши, кириш-чиқиш йўлакларида автомобиллар ғилдирагини ювиш ҳовузлари қурилган бўлиши.
Бундан ташқари, қурилиш ва чиқиндиларни ташиш вақтида транспорт воситалари брезент ёки PVX қоплама билан ёпилиши шарт этиб белгиланди.
Майдони 1 000 кв.м дан катта бўлган қурилиш участкаларида фон мониторинг станциялари ўрнатилиши ва улар Экология қўмитасига интеграция қилиниши – қурилишни давом эттириш учун асосий талаб бўлади.
Шунингдек, жисмоний шахслар ўз ерида дарахт ва буталарни суғориш учун ичимлик сувини ишлатиш вақтига белгиланган чеклов – баҳор ва ёз фаслларида (00:00 дан 05:00 гача) бекор қилинади.
Бунда ичимлик сувининг бошқа мақсадларда ишлатилиши бўйича амалдаги чеклов сақланиб қолади. Кўп квартирали уйларда суғориш учун алоҳида сув резервуарлари ўрнатилиши назарда тутилади.
Меҳмон гуруҳидаги фойдаланувчилар ушбу мақолага изоҳ қолдира олмайди.
