Ўзбекистон Сенати аёллар ва болалар ҳуқуқларини ҳимоя қилишни кучайтирди
Сенатнинг 15-ялпи мажлисида бола ҳуқуқларини кафолатлаш ҳамда хотин-қизларни зўравонликдан ҳимоя қилишни кучайтиришга қаратилган қонун кўриб чиқилиб, маъқулланди. Мазкур ҳужжат билан “боланинг энг устун манфаатлари” тушунчасининг ҳуқуқий мақоми белгиланиб, оиладаги масалаларда боланинг ўз фикрини эркин ифода этиш ҳуқуқи киритилмоқда.
Сенатнинг 15-ялпи мажлисида “Ўзбекистон Республикасининг айрим қонун ҳужжатларига бола ҳуқуқларининг кафолатларини янада кучайтиришга ҳамда тазйиқ ва зўравонликдан жабрланган хотин-қизларни ҳимоя қилиш тизимини янада такомиллаштиришга қаратилган ўзгартириш ва қўшимчалар киритиш тўғрисида”ги қонун кўриб чиқилди. Ушбу ҳужжат мамлакатимизда инсон қадрини улуғлаш ҳамда хотин-қизлар ва болалар манфаатларини ҳимоя қилишга қаратилган ислоҳотларнинг мантиқий давоми ҳисобланади. Бу ҳақда Uzdaily.uz хабар беради.
Қонунда “боланинг энг устун манфаатлари” тушунчасининг ҳуқуқий мақоми белгиланмоқда. Оила кодексига киритилаётган ўзгартиришларга кўра, оилада бола манфаатига оид ҳар қандай масала кўрилаётганда, бола ўз фикрини эркин ифода этиш ҳуқуқига эга бўлади.
Шунингдек, тазйиқ ва зўравонликдан жабрланган хотин-қизларни ҳимоя қилиш бўйича давлат органларининг ваколатлари кенгайтирилди. Ижтимоий ҳимоя миллий агентлигига жабрланувчиларнинг манфаатларини кўзлаб, судларга давлат божи тўламасдан даъво аризалари билан чиқиш ҳамда суд мажлисларида вакили орқали иштирок этиш ҳуқуқи берилмоқда.
Бундан ташқари, тазйиқ ва зўравонликдан жабрланган шахсларни махсус марказларга жойлаштириш билан боғлиқ ижтимоий кафолатлар аниқлаштирилди. Хусусан, жабрланувчининг махсус марказда бўлган бир ойгача бўлган даври унга вақтинча меҳнатга лаёқатсизлик варақасини бериш учун асос бўлади. Сенат аъзолари ушбу қонунни маъқуллашди.
Изоҳлар 0
…