Украина ҳарбийлари Херсондаги йирик кўприкка ракеталар отди. Бу кўприкнинг аҳамияти нимада?

^{Фото: УНИАН}
Украина ва Россия томони украин қуролли кучлари Днепр дарёси орқали ўтган Антоновский кўприги ҳудудига ракета зарбалари йўллаганини тасдиқлади. Бу кўприк РФ армияси томонидан ишғол қилинган Херсонни областнинг дарёнинг чап соҳилидаги Қримга туташ ҳудудлари билан боғлайди. Бу зарба ҳақида нималар маълум ва кўприк Украина жануби учун жангларда қанчалик муҳим ўрин тутади?

Херсон областининг россияликлар томонидан тайинланган «янги маъмурияти» раҳбари ўринбосари Кирилл Стремоусовнинг сўзларига кўра, украин ҳарбийлари кўприк ҳудудига Американинг HIMARS баравар ўт очиш реактив тизими орқали ўт очган.

«HIMERS [Интерфакс учун интервьюда Стремоусов қурилмани шундай атаган - таҳр.] болванкалари етиб келди, жами тўртта тешик пайдо бўлган. Биттасининг диаметри бир метр келади, қолган учтаси - тахминан 20-30 см. Аниқлик билан зарба беришган, шаҳарнинг бир қисмини Алешки томондан кесиб қўйишни исташган. Жабрланганлар йўқ, аҳоли яшовчи микрорайонларга ҳеч нарса келиб тушмаган», деган у.

Стремоусовнинг сўзларига кўра, Украина томонидан йўлланган зарбалар оқибатидаги шикастланишлар кўприк конструкциясига таҳдид солмаган. «Кўприк пойдеворини мўлжалга олишган. Аммо кўприк бутун, маҳкамлагичлари бузилмаган», деган у ва кўприк бўйлаб ҳаракат оператив-текширув тадбирларидан кейин тикаланиши мумкинлигини айтган.

Кўприкдаги тешиклар ва вайронгарчиликлар акс этган видео телеграм-каналларда тарқалган.

Зарба кўприкка эмас, блокпостга берилган бўлиши ҳам мумкин
Херсон области ҳарбий маъмурияти раҳбари маслаҳатчиси Сергей Хлан эса украин кучлари кўприкнинг ўзига эмас, россияликларнинг кўприк атрофида жойлашган базаси бўйлаб зарба берганини айтмоқда.

«Асосий нишон Херсонда бўлган - Антоновский кўприги эмас. Унинг атрофида. «Наири» кафеси ҳудудида, орклар (россиялик ҳарбийлар назарда тутилган) бу ерда қўриқлаш пункти ташкил этишган ва окоплар қазишган. Ракеталар ўша жойларга учиб борган. У ерда орклар кучли истеҳком барпо этган, кўплаб қуроллар жойлаштирган, у ерни қўриқлаш билан шуғулланадиган ва кўприклар орасидаги ҳудудда кучли назорат пункти вазифасини ўтайдиган ҳарбий қисм жойлашган. Ҳозир ўша ерда кучли портлашлар бўлди», деган Хлан украин телевидениеси эфирида.

Украин ҳарбий эксперти, Kyiv Independent нашри мухбири Илья Пономаренко твиттердаги саҳифасида сешанба кунги зарбалар «Украинанинг Антоновский кўпригини йўқ қилишга қаратилган ҳужуми бўлмагани»ни айтади. «Бунда ракета ва артиллерия снарядларидан фойдаланиш анча самарасиз. Менимча, бунинг учун Украина яхшиси Су-24М ва [кучли авиация] портловчи-парчаланувчи бомбаларидан фойдалангани маъқул. Бунинг учун эса аввал Россия ҳаво ҳужумидан мудофаа тизими масаласини ҳал қилиш талаб этилади», деб ҳисоблайди у.

Ҳудуднинг россияпараст янги маъмурияти вакиллари маълум қилишича, янги ҳужумлар кутилаётгани туфайли ҳозирда Херсон областида ҳаво ҳужумидан мудофаа тизими кучайтирилган.

Антоновский кўприги қандай стратегик аҳамиятга эга?
Антоновский кўприги - Днепр орқали ўтиб, Херсонни дарёнинг чап соҳили, жумладан Алешки шаҳри билан боғловчи автомобил ўтиш йўлидир. Унинг узунлиги қарийб 1,4 км, кенглиги - 25 метр.

Кўприк Россия армияси учун муҳим стратегик аҳамиятга эга, Херсон ва дарёнинг нариги соҳилидаги қўшинлар учун қурол ва ўқ-дорилар ўтказиладиган асосий йўллардан бири шу кўприк орқали ўтади.

Агар кўприк қулаб тушса, бу россиялик ҳарбийларнинг таъминотини жиддий даражада қийинлаштиради. Днепр орқали ўтган бошқа энг яқин кўприк тахминан 90 км масофада, Нова Каховкадан ўтган.

Бундан ташқари, Антоновский кўпригидан Қрим, Азов ва Қора денгизнинг Россия ҳудудидаги соҳилларига олиб борувчи трасса ҳам ўтган.

Украина қуролли кучлари бу кўприк томон муваффақиятли юриш қилса, Россия қўшинлари Днепрнинг чап соҳилига чекинишига тўғри келиши мумкин. Воқеаларнинг бундай ривожида Украина ҳарбийлари Антоновский кўприги орқали ўтказилиши мумкин, аммо ҳарбий экспертлар айтишича, РФ армияси чекингудек бўлса, катта эҳтимол билан уни портлатиб юборади.

Кўприк ҳозирда украинларнинг ракеталари учун етиб бориш мумкин бўлган нишонга айлангани фактининг ўзи мамлакат жанубидаги ҳарбий ҳаракатларга таъсир кўрсатиши мумкин.

«Антоновский кўприни Днепрнинг чап соҳилидаги оккупантлар учун асосий таъминот линияси ҳисобланади. Улар энди Украина қуролли кучлари нишони остида турибди. Украина қуролли кучлари душманнинг фронт ортидаги омборлари ва бошқарув пунктларини муваффақият билан йўқ қилмоқда. Шунинг учун айтиш мумкинки, украин қўшинлари бу ҳудудда кириш тақиқланган ҳудуд тайёрламоқда», деган Украинанинг «Эспрессо» телеканали эфирида ҳарбий эксперт, Киевдаги Defense Express компанияси раҳбари Валерий Рябих.

Украина Американинг 80 км масофадаги нишонларга ҳам аниқ зарба беришга қодир бўлган HIMARS баравар ўт очиш реактив тизимлари туфайли Россия қўшинларининг фронт ортидаги объектларига ҳужум қилиш имкониятига эга бўлди. Сўнгги кунларда Украина қуролли кучлари бир неча марта Россиянинг Херсон областидаги гуруҳлари объектларига, хусусан Нова Каховкадаги ўқ-дори омборларига зарбалар берди.

Ғарб экспертлари ва украин ҳарбийларининг фикрича, россияликларнинг ўқ-дори омборлари ва бошқарув пунктлари муваффақиятли ўққа тутилиши Украинага РФнинг Северодонецк ва Лисичанскни эгаллаб олишда қўл келган ўт очиш кучи бўйича катта устунлигини енгиб ўтишга имкон беради. «Замин»ни Telegram’да ўқинг!