Фото: Shutterstock
Россия уруш бошланганидан буён ўзининг кам сонли иттифоқчиларидан бири бўлиб қолаётган Шимолий Кореядан миллионлаб артиллерия снарядлари, яқин ва олис масофаларга отишга мўлжалланган ракеталар сотиб олмоқда. Бу ҳақда The New York Times АҚШ разведкаси маълумотларига таяниб хабар берган. Бу борада CNN'да ҳам маълумотлар пайдо бўлди.
CNN билан суҳбатда исмини ошкор қилишни истамаган америкалик амалдор Пхенян Россияга ўқ-дориларни қандай етказиб беришига аниқлик киритмаган, аммо келажакда Россия КХДРдан ҳарбий техника сотиб олиши мумкинлигини ҳам истисно қилмаган.
The New York Times ҳозирча бу маълумотларни мустақил манбалардан текшириш имконсиз эканини маълум қилган.
Россия Шимолий Кореядан қурол сотиб олиши ҳақидаги маълумотлар руслар Эрондан ҳарбий дрон сотиб олиши тўғрисидаги хабардан бир ҳафта ўтиб тарқалди. Бу борада суриштирув ўтказган The Washington Post нашри Эрон ҳарбий дронларининг Россиядаги илк синов парвозлари муваффақиятсиз чиққани, руслар бундан норози бўлгани ҳақида ёзганди.
The New York Times билан суҳбатда бўлган америкалик амалдорнинг сўзларига кўра, Шимолий Кореядан снаряд ва ракета сотиб олиши Россияда армияни керакли ўқ-дори билан таъминлаш бўйича муаммо кузатилаётганини кўрсатади ва бу Ғарб санкциялари оқибатидир.
Газетанинг ёзишича, Москва Пекин ҳам санкция чекловларини бузиб, ўзига қурол сотишига умид қилган, аммо Хитой ҳозирча Украинада урушаётган Россияга қурол ёки уларни ишлаб чиқариш учун компонентлар сотиш ҳақида ўйламаяпти. Олдинроқ АҚШ Хитойни Россияга қурол сотишнинг оқибатларидан огоҳлантирганди.
Америкалик ҳарбий эксперт Фредрик Каганнинг фикрича, Шимолий Кореядан снаряд сотиб олиши Россия ўзи учун керакли бўлган ўқ-дориларни мустақил ишлаб чиқара олмаётганидан нишона.
«Кремл Шимолий Корея ёки бошқа давлатдан қурол сотиб олаётгани Путин мамлакат иқтисодиётини энг ёмон ҳолатда ҳам урушга сафарбар қилишни истамаётганини ифодалайди», дейди эксперт.
Урушни ўрганиш халқаро институтининг Россия бўйича экспертлар гуруҳи раҳбари Мэйсон Кларкнинг айтишича, Кремл Шимолий Кореядан нимадир сотиб оладиган даражага келиб қолганидан хавотирга тушиши керак.
The New York Times эълон қилган суриштирувда ёзилишича, руслар Шимолий Кореядан қурол сотиб олишга мажбур бўлаётгани Россиянинг ўзида захиралар тугаб бораётганидан далолат.
Охирги вақтларда Шимолий Корея Россия билан муносабатларни янада яқинлаштиришга уринаётгани икки давлат ўртасидаги алоқаларда ҳам сезилмоқда. Хусусан, Шимолий Корея ўзини мустақил деб эълон қилган ва ҳозирда Россия назоратида бўлган «ДХР» ҳамда «ЛХР»ни Россия ва Суриядан кейин тан олган учинчи давлат ҳисобланади.
Аввалроқ Шимолий Корея Россия уруш вақтида эгаллаб олган ва вайронага айланган Луҳанск ҳамда Донецк вилоятларини тиклашда ўз ишчилари иштирокини таклиф қилгани ҳақида хабарлар чиққанди. Бунинг исботи ўлароқ Шимолий Кореянинг Москвадаги элчиси икки тан олинмаган республика вакиллари билан меҳнат миграцияси масаласида учрашув ўтказганди.
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
