25-29 апрел кунлари Қирғизистоннинг Баткен шаҳрида Қирғизистон, Ўзбекистон ва Тожикистон ҳукуматлари делегацияларининг учрашувлари бўлиб ўтди.
Қирғизистон ҳукумати матбуот хизматининг хабар беришича, музокараларда учта давлат чегаралари кесишган нуқталарга аниқлик киритиш масаласи бўйича фикр алмашилган.
“Учрашувлар дўстлик ва ўзаро тушуниш руҳида ўтди”, – дейилади хабарда.
Қўшимча қилинишича, кейинги учрашув Тожикистон ҳудудида бўлиб ўтади.
Эслатиб ўтамиз, 2022 йил ноябр ойида Ўзбекистон ва Қирғизистон президентлари чегара бўйича келишувларни имзолади, шундан сўнг икки мамлакат ўртасида чегара масаласида ҳеч қандай келишмовчиликка ўрин қолмагани эълон қилинди. Шунингдек, Ўзбекистон-Тожикистон чегарасининг катта қисми 2018 йил 9 мартдаги шартнома асосида делимитация қилинган. Қирғизистон ва Тожикистон ўртасидаги чегара масалаларини ҳал қилиш бўйича эса жиддий силжиш кузатилмаяпти.
“Замин” янгиликларини “Telegram”да кузатиб боринг
