1 январдан чет элликларнинг Россияга кириш қоидалари кучайтирилди

^{Фото: Reuters}
2025 йил 1 январдан бошлаб Россияга кирувчи хорижий фуқароларнинг вақтинча бўлиш муддатига оид қонунчиликдаги ўзгаришлар кучга кирди.

Жумладан, хорижликларнинг Россияда визасиз бўлиш муддати 90 кунгача қисқартирилди. Илгари бу муддат 180 кунни ташкил қилар эди.

Ўзгартиришлар Россияга визасиз кирадиган чет эл фуқароларига тегишли. Россияга виза билан келган хорижликларнинг вақтинча бўлиш муддати ўзгаришсиз қолмоқда.

Шунингдек, 2025 йил 5 февралдан Россияда чет эл фуқаролари учун янги махсус «чиқариб юбориш режими» ишга тушади, бу полицияга мигрантларни мамлакатдан чиқариб юбориш тўғрисида мустақил равишда қарор қабул қилиш имконини беради. Илгари фақат судлар ва Россия Чегара хизмати бундай ҳуқуққа эга эди.

Шундай қилиб, маъмурий ҳуқуқбузарлик содир этган хорижликлар махсус электрон реестрга киритилади, унга кириш автомашинани бошқариш, кўчмас мулк билан боғлиқ битимлар тузиш, турмуш қуриш, бошқа ҳудудга кўчиб ўтиш ва ҳоказоларни тақиқлаши мумкин.

Шу билан бирга, 2025 йил 5 февралдан бошлаб Россия чегарачилари мамлакат хавфсизлигига таҳдид солиши мумкин бўлган чет эл фуқаросига киришни рад этиш ҳуқуқига эга бўлади.

1 январ Чет элликлар Россия Кириш қоидалари Кучайтириш