Қозоғистон парламенти депутатлари Жиноят кодексига келин ўғирлаш учун алоҳида жазо чоралари киритишни таклиф қилишди. Мазкур ўзгартишлар яқин вақт ичида қабул қилиниши кутилмоқда. Бу ҳақда депутат Мурат Абенов маълум қилди, деб хабар беради Vlast.kz.
Жиноят кодексига янги модда киритилиши мумкин
Мурат Абеновга кўра, таклиф ҳозирда Жиноят, Жиноят-ижро ва Жиноят-процессуал кодексларини оптималлаштириш бўйича ишчи гуруҳ томонидан муҳокама қилинмоқда. Янги моддада вазиятга қараб турли жазо чоралари назарда тутилган:
- Жарима ва жамоат ишлари;
- Оғир ҳолатларда – 3 йилдан 5 йилгача озодликдан маҳрум қилиш.
Депутатга кўра, агар келин ўғирлаш бир гуруҳ шахслар томонидан, вояга етмаган шахсга нисбатан содир этилган ёки жабрланувчига зарар етказилган бўлса, судланган шахс 3-5 йилгача қамоқ жазосига ҳукм қилиниши мумкин.
«Бу анъана эмас, жиноят» – депутат Абенов
Мурат Абенов келин ўғирлашни «урф-одат» сифатида қабул қилиш нотўғри эканини таъкидлади.
«Аслида бизда бундай анъаналар бўлмаган. Қизлар ота-онасининг розилигисиз турмушга чиқмоқчи бўлса, ўз ихтиёри билан қочиб кетиши мумкин эди. Аммо келин ўғирлаш – бу оғир жиноят», – деди у.
Ҳозирги қонунчиликда келин ўғирлашга алоҳида жазо йўқ
Қозоғистон Жиноят кодексида ҳалигача келин ўғирлаш бўйича алоҳида модда мавжуд эмас. Бу каби ҳолатлар «Одам ўғирлаш» моддаси асосида кўриб чиқилади. Унга кўра, айбланувчи 15 йилгача озодликдан маҳрум қилиниши мумкин.
Шу билан бирга, қонунчиликда «ўғирланган шахсни ўз ихтиёри билан озод қилган шахс, агар унинг ҳаракатларида бошқа жиноят таркиби бўлмаса, жазодан озод этилади» деган банд бор. Бу эса келин ўғирловчиларнинг жиноий жавобгарликдан қочишига сабаб бўлиши мумкин.
Янги қонун қабул қилинса, келин ўғирлаш учун алоҳида жиноий жавобгарлик белгиланади ва бу каби ҳолатларнинг олдини олишга ёрдам беради. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
