АҚШда бир нечта хавфсизлик амалдори лавозимидан олинди

АҚШ Миллий хавфсизлик кенгашининг бир нечта юқори мартабали амалдори 3 апрель куни эгаллаб турган лавозимларидан озод этилди, деб Reuters хабар берди.

«Вазиятдан хабардор уч кишининг сўзларига кўра, пайшанба куни эрталаб Оқ уй ҳузуридаги Миллий хавфсизлик кенгашининг бир нечта директори лавозимдан бўшатилган», — дейилади хабарда.

Манбалар ишдан бўшатиш сабаби ҳақида аниқ маълумот бермаган, аммо икки суҳбатдош бу ҳолатни амалдорларга нисбатан ўтказилган текширув натижалари билан боғлаган. Маълумотларга кўра, ишдан кетганлар орасида технология ва миллий хавфсизлик масалаларига масъул катта директор Дэвид Фейт ҳам бор.

Охирги ҳафталарда Доналд Трамп жамоаси фаолияти билан боғлиқ бир қанча можаролар юзага келди. Жумладан, АҚШ президентининг миллий хавфсизлик бўйича маслаҳатчиси Майк Уолц икки бор шубҳали ҳолатларга аралашиб қолган. Аввалига у Ямандаги ҳусийларга қарши зарбаларга оид махфий маълумотлар тарқалишида тилга олинди. Кейинроқ, унинг ёрдамчилари ҳарбий масалаларни шахсий Gmail аккаунти орқали муҳокама қилгани маълум бўлди.

Шундан сўнг ОАВда тарқалган маълумотларга кўра, маъмуриятдаги айрим шахслар Майк Уолцнинг истеъфосини талаб қилмоқда. “Замин” янгиликларини “Telegram”да кузатиб боринг