АҚШда 25 йил аввал содир этган қотиллик учун 48 ёшли эркак қатл этилди

АҚШнинг Флорида штатида 25 йил аввал содир этилган жиноят учун судланган эркакқа нисбатан ўлим жазоси ижро этилди. Бу ҳақда UPI ахборот агентлиги хабар берди.

Қатл 9 апрель куни амалга оширилган. Жиноятчи — Майкл Танзи — Флорида штатидаги Раифорд шаҳрида жойлашган қамоқхонада ўлдирилган. Жазо қайси усулда ижро этилгани расман айтилмаган. Аммо Флоридада, одатда, ўлим жазоси инексия ёки электр стули орқали бажарилади.

2000 йилдаги қотиллик: китоб ўқиётган аёлга ҳужум
Марҳум жинояти 2000 йилда содир этган. Суд ҳужжатларига кўра, Майкл Танзи 25 апрель куни Майамидаги боғда фургонида китоб ўқиб ўтирган Акоста исмли аёлга ҳужум қилган. Аввалига ундан сигарет сўраган, сўнг аёлнинг юзига зарба бериб, уни машинаси билан бирга ўғирлаб кетган.

Танзи уни лезва билан таҳдид қилиб, Флорида Кейс томон олиб кетган. Йўлда арқон билан боғлаб, оғзига сочиқ тиққан, жинсий зўравонлик қилган ва банк карточкасидан пул ечиб олган.

Сўнгра Акостани бўғиб ўлдирган ва унинг жасадини ўрмонли ҳудудга ташлаб кетган.

Икки кунда фош қилинган қотиллик
Аёл йўқолганидан сўнг яқинлари бу ҳақда полицияга хабар берган. Орадан икки кун ўтгач, Танзи аёлнинг фургонини ҳайдаб кетаётганида қўлга олинган. Унинг ёнидан Акостанинг банк ҳисобидан пул ечилганига оид далиллар топилган.

Танзи жиноятни тўлиқ тан олган — полицияга жасад қаерга ташланганини, ишлатилган скотч ва арқон қаерга улоқтирилганини ҳам кўрсатган.

Суд ҳукми ва ўлим жазосининг ижроси
2003 йил 11 апрелда Танзи биринчи даражали қотиллик, автомобил ўғирлаш, одам ўғирлаш ва қуролли талончилик моддалари бўйича ўлим жазосига ҳукм қилинган. У барча апелляция ҳуқуқларидан фойдаланган, лекин ҳукм ўз кучида қолган.

Болаликдаги оғриқ, катталикдаги фожеа
Маҳаллий инсон ҳуқуқлари ташкилоти маълумотига кўра, Танзи болалигида жинсий ва жисмоний зўравонликка дучор бўлган, ва бу унинг шахсий ҳаётига оғир таъсир кўрсатган. Ёшлигининг охирида ўз жонига қасд қилишга уринган, ва 3 йил ўтиб — қотиллик содир этган.

Бу йил Флоридада учинчи қатл
Танзи — 2025 йилда Флоридада қатл этилган учинчи шахс. Умуман, шу йил АҚШ бўйлаб 11 та ўлим жазоси амалга оширилган.

25 йил олдинги қотиллик учун ижро этилган жазо АҚШда ўлим жазоси бўйича мавжуд қатъий қонунчилик ва унинг амалий татбиқини яна бир бор кўрсатиб берди. Танзининг шахсий фожеаси, оғир болалиги ва содир этган жинояти эса инсон руҳияти ва адолат ўртасидаги мураккаб алоқани яна бир бор ёритди. «Замин»ни Telegram’да ўқинг!