Хитой сунъий интеллект ёрдамчисини космик станцияда ишга туширди

Хитойнинг «Тянгун» космик станциясида «Укун» номли сунъий интеллект чат-боти иш бошлади, деб Kursiv.media хабар берди.

У катта тил модели асосида ишлаб чиқилган бўлиб, 15 июль куни «Тянчжоу-9» юк кемаси орқали станцияга етказилган.

«Укун» экипажга мураккаб операцияларни режалаштириш, кўрсатмалар бериш ҳамда реал вақтда маълумот тақдим этишда ёрдам беради. Учинчи марта очиқ космосга чиқиш жараёнида космонавтлар ушбу тизимдан фойдаланиб, аниқ тавсиялар олган ва унинг қулайлиги ҳамда тўлиғини юқори баҳолаган.

Муттахассислар фикрича, ушбу тажриба Хитой космик дастурларида сунъий интеллектни кенгроқ қўллаш, миссиялар хавфсизлиги ва самарадорлигини оширишга хизмат қилади.