Шри-Ланканинг жанубий ҳудудида юз берган йўл-транспорт фожиаси бутун мамлакат жамоатчилигини ҳаяжонга солди. Adaderana портали тарқатган хабарга кўра, 4 сентябрь куни кечқурун Элла шаҳри атрофида йўлдан чиқиб кетган автобус 150 метр чуқурликдаги жарликка қулаган.
Расмий маълумотларга кўра, автобусда ҳайдовчи билан бирга 30 нафар йўловчи бўлган. Ачинарлиси, ҳодиса оқибатида камида 15 киши жон таслим қилган. Жабрланувчилар орасида Тангалле курорт шаҳарининг шаҳар кенгаши аъзолари ҳам борлиги айтилади.
Полициянинг дастлабки маълумотларига кўра, транспорт воситаси катта йўлдан чиқиб кетиши натижасида бу ҳалокат юз берган. Қутқарув гуруҳлари ва тиббиёт ходимлари ҳозирда ҳодиса жойида иш олиб боришмоқда, тирик қолганларни қутқариш ва жароҳатланганларга ёрдам кўрсатиш ишлари давом этмоқда.
Мутахассислар бундай ҳолатлар Шри-Ланканинг тоғли ҳудудларида йўл инфратузилмаси ва хавфсизлик чораларини кучайтириш зарурлигини яна бир бор эслатиб қўйганини таъкидлашмоқда. Чунки йўллардаги эътиборсизлик ёки техник носозликлар кўп ҳолларда инсон ҳаётига оғир таҳдид солади.
Жамоатчилик бу фожиани катта қайғу билан қарши олди. Маҳаллий оммавий ахборот воситалари воқеани мамлакатнинг сўнгги йиллардаги энг даҳшатли йўл ҳалокатларидан бири сифатида қайд этмоқда.
«Замин»ни Telegram’да ўқинг!
