Боливияда 19 октябрь, якшанба куни бўлиб ўтган президентлик сайловларининг иккинчи тури мамлакат сиёсий саҳнасида янги саҳифа очди. Марказчи йўналишдаги Partido Democrata Cristiano партиясидан номзод — сенатор Родриго Пас Перейра сайловда ғалаба қозонди, деб хабар берди dw.com.
Сайлов комиссияси маълумотларига кўра, Пас тахминан 55 фоиз овоз тўплаб, рақибларини ортида қолдирди. Бу натижа қарийб йигирма йил давом этган сўл лагер ҳукмронлигига расман нуқта қўйди.
Боливияда сўнгги икки ўн йил ичида сиёсий саҳна асосан икки шахс — собиқ президент Эво Моралес ва амалдаги президент Луис Арсе ўртасидаги рақобат билан белгиланган эди. Иккаласи ҳам Movimiento al Socialismo (MAS) сўл партиясининг етакчи вакиллари ҳисобланади.
58 ёшли ғолиб Родриго Пас Ла-Пас шаҳрида бўлиб ўтган митингда халққа мурожаат қилиб шундай деди:
«Бугун Боливия ҳақиқий ечимлар тақдим этадиган ҳукуматга эга бўлди. Биз босқичма-босқич мамлакатнинг халқаро мавқеини тиклаймиз ва фуқароларнинг ишончини қайтаришга киришамиз».
Паснинг рақиби, ўнг консерватив Libertad y Democracia партиясидан номзод Хорхе Кирога рақибини табриклади, бироқ расмий натижалар эълон қилиниши кутилмоқда, деб таъкидлади.
Эслатиб ўтамиз, Лотин Америкасидаги энг машҳур сўл сиёсатчилардан бири Эво Моралес конституциявий чекловлар туфайли яна президентликка номзодини қўя олмади. Луис Арсе эса рейтингининг кескин пасайгани боис ўз номзодини сайлов олдидан қайтариб олганди.
Шундай қилиб, Боливиядаги сиёсий манзара янгича тус олди — мамлакат кўп йиллик сўл йўналишдан кейин марказчи сиёсатчилар қўлига ўтди. Бу натижа Лотин Америкаси сиёсий мувозанатида ҳам муҳим бурилиш сифатида баҳоланмоқда.
“Zamin”ни Telegram'да ўқинг!
