АҚШ президенти Доналд Трамп мамлакат фуқаролари учун янги молиявий ташаббусни эълон қилди. Унинг сўзларига кўра, божхона тарифларидан йиғиладиган даромадлар ҳисобидан ҳар бир америкалик фуқарога камида 2000 доллар тўлов амалга оширилади. Бу ҳақда Трамп Truth Social ижтимоий тармоғида маълум қилди.
Президент таъкидлашича, тўловлар юқори даромадли шахсларни истисно қилган ҳолда барча америкаликларга берилади. Шу билан бирга, у тариф сиёсатини танқид қилувчиларни “аҳмоқлар” деб атаб, божхона даромадлари орқали мамлакат давлат қарзини қисқа муддатда ёпиш мумкинлигини қайд этди.
Трампнинг фикрича, Қўшма Штатлар тарифлар орқали триллионлаб доллар даромад олиши мумкин ва бу АҚШ иқтисодиётини “янги босқичга олиб чиқади”.
Эслатиб ўтамиз, 2025 йил апрелда Трамп бир қатор давлатлар учун янги тарифлар жорий этиш режасини маълум қилган эди. Унинг таъкидлашича, бу чора АҚШ манфаатларини ҳимоя қилиш ҳамда мамлакатни йиллар давомидаги иқтисодий босимдан халос этишга қаратилган.
“Zamin”ни Telegram'да ўқинг!
