Украинада энергетика соҳасидаги "Энергоатом" атрофида юзага чиққан кенг кўламли коррупция можароси сиёсий саҳнага жиддий тебраниш олиб кирди. Собиқ президент Пётр Порошенко ҳукуматнинг бу масалага муносабатини кескин танқид қилиб, амалдаги Бош вазир ва унинг бутун жамоасини истеъфога чиқишига чақирди. Унинг фикрича, ҳозирги вазиятда фақат икки вазирни лавозимидан четлаш билан чекланиш жуда суст ва самарасиз қадам ҳисобланади.
Порошенко 17 ноябрь куни эълон қилинган видеомурожаатида: «Бу бошдан-оёқ коррупцияга ботган "Кабминдич" таркиби тўлиқ равишда истеъфо бериши шарт», дея кескин баёнот берди. У "ошкор қилинган материалларда камида беш амалдорнинг исми тилга олинганини" таъкидлаб, ҳукумат ҳаракатларини профанация, яъни кўзбўямачилик деб атади.
Янги коалиция тузиш чақириғи
Порошенко мавжуд сиёсий инқирозни юмшатиш ва жамиятнинг ҳукуматга бўлган ишончини тиклаш учун "миллий қутқариш ҳукумати"ни шакллантириш зарурлигини айтди. Унинг фикрича, бу коалиция турли партияларни бирлаштирган ҳолда, обрў-эътиборга эга мутахассислардан шаклланиши керак. Ҳозирги вазиятда, айниқса фронтдаги мураккаб шароит туфайли, сиёсий беқарорликка йўл қўймаслик энг катта вазифадир.
Оппозициядан қўллаб-қувватлаш, аммо етарли овоз йўқ
Порошенко ташаббусини парламентдаги "Голос" фракцияси қўллаб-қувватлади. Бироқ амалдаги рақамлар бошқача манзарани кўрсатади: "Европа ҳамжиҳатлиги" ва "Голос" биргаликда жами 45 ўринга эга холос. Ҳукуматга ишончсизлик вотумини расман муҳокама қилиш учун камида 226 депутатнинг розилиги лозим. Демак, ташаббус қўллаб-қувватловчилар сони кескин ошмаса, Порошенко таклифининг амалга ошиш эҳтимоли жуда паст.
Коррупция можаросининг марказида кимлар турибди?
10 ноябр куни Украина Миллий коррупцияга қарши бюроси (НАБУ) ва Махсус антикоррупция прокуратураси (САП) энергетика соҳасидаги жуда йирик схеманинг фош этилганини маълум қилди. Тергов доирасида ҳукуматнинг бир қатор амалдаги мансабдорлари, президент Зеленскийнинг узоқ йиллик шериги Тимур Миндич ва молия соҳасидаги номдор шахс Александр Цукерман асосий фигурантлар сифатида тилга олинди.
Ҳуқуқни муҳофаза қилувчи органлар Миндичнинг уйини, "Энергоатом" биносини, шунингдек адлия вазири Герман Галушченко манзилини тинтувдан ўтказди. Миндич эса, тергов ҳаракатлари бошланишидан олдин Украина ҳудудини тарк этгани маълум қилинди.
Зеленскийнинг жавоби ва қатор истеъфолар
12 ноябрь куни президент Зеленский адлия вазири Галушченко ва энергетика вазири Светлана Гринчукни лавозимидан четлатишни талаб қилди. Улар президент баёнотидан кўп ўтмай, тезкор равишда истеъфо аризасини ёзди.
Шунингдек, 13 ноябрь куни Зеленский Миндич ва Цукерманга нисбатан санкция жорий этиш бўйича фармон имзолади.
Украинадаги вазият ҳали тинчланишга ўхшамайди. Коррупция можароси сиёсий саҳнада янги жараёнларни тезлаштириши, айрим тузилмаларнинг қайта шаклланишига сабаб бўлиши мумкин. Жамоатчилик эса ҳозирча бир савол билан банд: ушбу можаро Украина сиёсий ҳаётида қандай янги босқични бошлаб беради?
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
