Аргентина миллий жамоаси юлдузи Лионел Мессининг Ҳиндистондаги саёҳати Калкуттадаги тартибсизликлардан сўнг, мамлакат жанубидаги Ҳайдаробод шаҳрига кўчди. Бу ерда футболчи нисбатан тинч муҳитда кутиб олинди ва ташкилотчиликка жиддий эътирозлар бўлмади. Ушбу ташрифдан энг кўп тарқалган лавҳа — Мессининг маҳаллий расмий, Телингана штатининг Бош вазири Ревант Редди билан биргаликда маҳорат дарсида иштирок этиши бўлди.
Вазир машғулотлари: Месси кўп югуртирилди
Машғулот чоғида 56 ёшли амалдорнинг бирорта узатмаси ҳам аниқ манзилга бормади. Таъкидлаш жоизки, анчадан бери ҳеч ким Мессини тўп ортидан бунчалик кўп югуртирмаган эди. Бу ҳолатни Леонинг дўстлари, маҳаллий кишилар унчалик танимайдиган Луис Суарес ва Родриго Де Паул табассум билан кузатиб туришди.
Айтиш мумкинки, тадбирнинг ташкилотчилик даражаси вазирнинг футбол ўйнаш маҳоратидан анча устун бўлди.
Қизиқарли воқеа: Тадбирдаги яна бир бахтли киши — Месси билан қўл бериб саломлашган қўриқчи бўлди. Аммо бу вазирга унча ёқмади.
Голлар ва койиш
Қизиқарли машғулотдан сўнг, Месси ва вазир икки жамоада бир-бирига қарши кичик футбол ўйинини ўтказишди. Сиёсатчи ҳатто бир марта гол ҳам урди, Лео эса дубл (икки гол) қайд этди.
Ўйин тугаб, стадионни тарк этишда Редди қўриқчини койиб берган. Чунки қўриқчи иш вақтида ўзини тийиб тура олмасдан, Мессининг қўлини сиқишга журъат этганди. Вазир эса унга ўқрайиб қараган ва эътироз билдирган. Лекин ходим бу ҳолатдан унчалик хафа бўлмаган кўринади.
Ўйин крикет учун мўлжалланган ва мамлакатнинг собиқ бош вазири Раджив Ганди номидаги стадионда бўлиб ўтган.
Сиёсатчилар паради
Мессини кўриш учун шаҳарга парламентдаги мухолиф кучлар етакчиси ва Неру-Ганди сиёсий сулоласининг бешинчи авлодига мансуб бўлган Раҳул Ганди ҳам ташриф буюрди. У стадионга сиёсатчи опаси Приянка Гандининг фарзандлари билан бирга келган. Ҳозирда Ҳиндистонда барча Месси билан кўришишга ошиқмоқда: Калкуттада Болливуд юлдузи Шоҳрух Хон ҳам ўғлини футболчи билан учраштириш учун олиб келганди.
Келажакдаги режалар: Месси ҳозиргача Ҳиндистон жануби ва шарқида бўлди. Энди у ғарбга — Мумбайга сафар қилмоқда, кейин эса шимолга — пойтахт Нью-Делига боради. У ерда Лео мамлакатнинг амалдаги бош вазири Нарендра Моди билан учрашиши режалаштирилган.
Калкуттадаги кескинлик: Фарёд ва вайронагарчилик
Мессининг бу мамлакатга ташрифи Калкутгадаги ҳаво майдонида бошланган ва ўша ердаёқ мухлисларнинг тартибсизлигига сабаб бўлган. Асосий тадбир — 70 минг кишилик «Солт-Лейк» стадионидаги кўргазмали ўйин — амалдорлар ва қўриқчиларнинг футболчини қуршаб олиши туфайли ҳафсалани пир қилган тадбирга айланди.
Натижада Мессини деярли кўра олмаган ва ташкилотчиликдан норози бўлган мухлислар аввалига ҳуштакбозлик қилиб, сўнг майдонга турли буюмлар улоқтиришган. Хавфсизлик нуқтайи назаридан, қўриқчилар футболчини муддатидан олдин стадиондан олиб кетган. Бу эса мухлисларни янада ғазаблантириб, улар майдонга югуриб тушиб, ҳаммаёқни вайрон қилишган.
Мухлис сўзлари: “Биз сиёсатчилар селфи олишини томоша қилиш учун минглаб рупий тўладик, Месси эса бир неча дақиқада ғойиб бўлди”.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
