Эроннинг Минаб шаҳрида жойлашган қизлар мактабига берилган ракета зарбаси халқаро ҳамжамиятда катта шов-шувларга сабаб бўлмоқда. Reuters агентлигининг икки нафар америкалик расмийга таяниб хабар беришича, ушбу ҳужум ортида АҚШ ҳарбийлари турган бўлиши эҳтимоли ўрганилмоқда. Ҳозирча бу дастлабки хулосалар бўлиб, тергов жараёни якунига етмаган. Мутахассислар келгусида янги далиллар пайдо бўлиши ва вазият ўзгариши мумкинлигини истисно этмаяпти.
АҚШ расмийлари ҳужумда қандай қурол-яроғ ишлатилгани ёки нима учун айнан мактаб нишонга олингани ҳақида аниқ маълумот бермади. Бироқ The New York Times нашри вазиятга ойдинлик киритиб, Америка ҳарбий-ҳаво кучлари аслида Ислом инқилоби посбонлари корпуси базасини нишонга олган бўлиши мумкинлигини ёзди. Эҳтимол, техник хатолик ёки нотўғри координаталар туфайли зарба мактаб биносига келиб тушган.
АҚШ Мудофаа вазирлиги ҳозирча фақат воқеа юзасидан текширувлар олиб борилаётганини тасдиқлади. Эрон расмий манбаларининг маълум қилишича, 28 февраль куни содир бўлган ушбу мудҳиш ҳодиса оқибатида 165 нафар инсон ҳалок бўлган. Дунё ҳамжамияти мазкур фожиа юзасидан аниқ ва шаффоф тергов ўтказилишини талаб қилмоқда.
“Zamin”ни Telegram'да ўқинг!
