Украина президенти Владимир Зеленский Россия президенти Владимир Путин билан музокара ўтказишга тайёрлигини билдирган, аммо бундай учрашув Москвада бўлмаслигини маълум қилган. Бу ҳақда Украина президенти офиси маслаҳатчиси Сергей Лещенко айтди.
Унинг таъкидлашича, Киев Москвани “агрессор давлат пойтахти” деб ҳисоблайди ва шу сабабли бу форматни қабул қилмайди. Шу билан бирга, Зеленский бошқа ҳудудда учрашув ўтказиш эҳтимолини рад этмаган.
Аввалроқ Кремл вакиллари Путин Москвада музокара ўтказишга тайёрлигини билдирган эди. Россия президенти ёрдамчиси Юрий Ушаковнинг айтишича, агар Украина хоҳласа, Москва музокаралар учун шароит яратишга тайёр.
Шу кунларда Словакия бош вазири Роберт Фицонинг Москвага ташрифи ортидан турли тахминлар ҳам тарқалган. Бироқ Кремл Украина раҳбариятидан қандайдир “махсус хабар” олингани ҳақидаги маълумотларни рад этди.
“Zamin”ни Telegram'да ўқинг!
