Эпштейн ишида тилга олинган агент уйидан ўлик топилди

Америкалик молиячи ва жинсий жиноятларда айбланган Жеффри Эпштейн билан боғлиқ ишда номи бир неча бор тилга олинган моделлар агенти Даниел Сиад Франциядаги уйида вафот этган ҳолда топилди. Бу ҳақда France 24 хабар берди.

Маълум қилинишича, 69 ёшли Швеция фуқароси бўлган Даниел Сиаднинг жасади 20 июль куни Франциянинг Коломб шаҳридаги яшаш манзилидан аниқланган. Ҳозирча унинг ўлимига нима сабаб бўлгани расман маълум қилинмаган. Ҳуқуқни муҳофаза қилувчи органлар томонидан ҳолат юзасидан тергов ҳаракатлари бошланган.

АҚШ Адлия вазирлиги эълон қилган Эпштейнга оид ҳужжатларда Даниел Сиаднинг исми 2 090 марта қайд этилган. Тергов материалларида у Францияда Жеффри Эпштейн учун ёш аёлларни таништирган шахс сифатида тилга олинган.

Шу йилнинг май ойида BFMTV телеканалига берган интервьюсида Сиад Эпштейнни яхши танишини яширмаган. У айрим ёш аёлларни унга таништирганини ҳам тасдиқлаган, бироқ буни фақат моделлик агентлиги фаолияти доирасида амалга оширганини айтган. Шу билан бирга, Эпштейннинг шахсий ҳаёти ёки ноқонуний ҳаракатларидан бехабар бўлганини таъкидлаган.

Эслатиб ўтиш жоиз, аввалроқ эълон қилинган суд ҳужжатларида Самарқандда туғилган ўзбекистонлик аёлнинг ҳам Эпштейн билан ёзишмалари ва алоқалари қайд этилган эди. Ҳужжатларга кўра, у молиявий ёрдам олгани ва Эпштейннинг айрим танишлари билан учрашувларга тайёрлангани ҳақида маълумотлар келтирилган.

Даниел Сиадга нисбатан беш нафар аёл зўрлаш ва жинсий зўравонлик бўйича шикоят қилган. Бироқ у барча айбловларни қатъий рад этиб, ҳаёти давомида ҳеч кимга нисбатан бундай жиноят содир этмаганини билдирган.

Унинг адвокати Меня Араб-Тигриннинг маълум қилишича, Сиад бир неча марта тергов органларига мурожаат қилиб, расман сўроқ қилинишини сўраган. Аммо у вафотига қадар бирор марта ҳам расмий тарзда сўроқ қилинмаган.

Адвокат, шунингдек, суд-тиббий экспертиза якунлари чиқмагунча ўлим сабаблари ҳақида хулоса қилишга эрталигини таъкидлади. Унинг сўзларига кўра, мижозига нисбатан ҳеч қачон расмий айблов эълон қилинмаган ва у ўзини доимо айбсиз деб ҳисоблаб келган.