Асалари чаққан кениялик тадбиркор вазиятни реклама учун ишлатди

Кенияда асалари боқиш билан шуғулланувчи тадбиркор Жарунда Жалуто билан боғлиқ ноодатий воқеа ижтимоий тармоқларда эътибор қозонди.

Хабарларга кўра, навбатдаги асал йиғими вақтида уни бир неча асалари чақиб олган. Натижада унинг юзида кучли шиш пайдо бўлган.

Бироқ тадбиркор бундан тушкунликка тушиш ўрнига, вазиятдан ўз бизнесини тарғиб қилиш учун фойдаланишга қарор қилган. У шишган юзи билан ўзининг “Asembo Natural Honey” бренди маҳсулотлари ёнида суратга тушган.

Суратга ҳазиломуз тарзда “Бу асалнинг 100 фоиз табиий эканининг исботи!” деган мазмунда изоҳ қолдирилган.

Ушбу ёндашув ижтимоий тармоқларда фойдаланувчиларнинг эътиборини тортиб, тадбиркорнинг ўз маҳсулотини ноодатий усулда реклама қилгани сифатида муҳокама қилинмоқда.