Баҳор фаслининг сўнгги ойи инсон организми учун жуда муҳим давр ҳисобланади. Қиш фаслидан кейин танада витаминлар етишмовчилиги, чарчоқ, ҳолсизлик ва иммунитет пасайиши каби ҳолатлар кузатилиши мумкин. Шу сабабли ҳам май ойида пишадиган табиий ва янги узилган мевалар организмни тиклашда беқиёс аҳамият касб этади. Мутахассислар айнан шу даврдаги мавсумий неъматларни “табиий витаминлар омбори” деб аташмоқда.
Айниқса, ҳозирги кунларда бозорларда пайдо бўлаётган қулупнай, тут, гилос ва эрта пишар ўриклар нафақат мазаси, балки шифобахш хусусиятлари билан ҳам ажралиб турибди.
Май ойининг энг машҳур ва севимли меваларидан бири, албатта, қулупнайдир. У нафақат хушбўй ҳиди ва ёқимли таъми, балки организм учун катта фойдаси билан ҳам қадрланади. Мутахассислар таъкидлашича, қулупнай таркибидаги витамин С миқдори айрим цитрус меваларидан ҳам юқори бўлиши мумкин. Бу эса иммунитетни мустаҳкамлаш, қон томирларини соғлом сақлаш ва терининг ёш ҳамда таранг бўлишига ёрдам беради.
Қулупнай таркибидаги фисетин моддаси эса мия фаолиятини қўллаб-қувватлаб, хотирани кучайтириш хусусиятига эга. Шу сабабли ҳам уни нафақат катталар, балки болалар рационига ҳам қўшиш тавсия этилади.
Май ойида пишадиган яна бир шифобахш неъмат — тут ҳисобланади. Оқ ва қора тут қадимдан халқ табобатида энг фойдали маҳсулотлардан бири сифатида қўлланиб келинган. Айниқса, темир моддасига бой бўлгани учун у камқонликка қарши курашишда табиий восита сифатида қадрланади.
Шу билан бирга, тут таркибида юрак фаолияти учун муҳим саналган кучли антиоксидант — ресвератрол ҳам мавжуд. Мутахассислар оқ тут нафас йўллари ва ўпка учун, қора тут эса ҳазм тизими учун жуда фойдали эканини таъкидлашмоқда.
Май ойининг ўрталарига келиб эса гилос фасли бошланади. Бу мева нафақат мазали, балки асаб тизими ва уйқу учун ҳам жуда фойдали саналади. Чунки гилос таркибида мелатонин гормони мавжуд бўлиб, у инсон уйқусини яхшилашга ёрдам беради.
Бундан ташқари, гилос бўғимлардаги оғриқларни енгиллаштириш хусусияти билан ҳам машҳур. Қанд миқдорининг нисбатан камлиги эса уни парҳез қилаётган инсонлар учун ҳам яхши танловга айлантиради.
Май ойининг энг тансиқ ва хушбўй меваларидан бири — эрта пишар ўриклар ҳам организм учун катта манфаат келтиради. Халқ орасида “чўлпи” деб аталадиган бу мевалар калий ва бета-каротинга бой бўлиб, юрак фаолиятини яхшилаш ҳамда кўриш қобилиятини мустаҳкамлашда муҳим аҳамиятга эга.
Мутахассислар юрак-қон томир касалликлари бор инсонларга кунига 5-6 дона янги узилган ўрик истеъмол қилишни тавсия этишмоқда.
Шифокорлар мавсумий меваларни танлашда бир неча муҳим қоидаларга амал қилиш кераклигини ҳам эслатиб ўтишмоқда. Аввало, иссиқхонада эмас, очиқ далада қуёш нури остида пишган табиий меваларни танлаш мақсадга мувофиқ. Чунки бундай меваларнинг таъми ва хушбўйлиги ҳам юқори бўлади.
Шунингдек, ҳар қандай фойдали маҳсулотни ҳам меъёридан ортиқ истеъмол қилиш аллергия ёки ҳазм билан боғлиқ ноқулайликларга олиб келиши мумкин. Эрта пишар меваларни истеъмол қилишдан олдин эса уларни яхшилаб ювиш тавсия этилади.
Мутахассислар фикрича, айнан ҳозирги кунларда организмни тез тиклаш ва энергияни ошириш учун қулупнай ҳамда тут энг юқори биологик қийматга эга маҳсулотлар ҳисобланади.
“Zamin”ни Telegram'да ўқинг!
