Мутахассислардан сутни косметик восита сифатида ишлатиш бўйича тавсиялар

^{Фото: Cosmopolitan}
Сут маҳсулотларининг керагидан ортиқ истеъмоли юзда ҳуснбузар ва тошмалар пайдо бўлишига олиб келади, аммо меъёрни билиш соғлиқ учун фойдали. Тери ва сочларни парвариш қилиш бўйича мутахассис Ребекка Форкастнинг таъкидлашига қараганда, сут тери ва сочга ижобий таъсир кўрсатади.

«Бувиларимиз кальций, оқсил ва витаминлар ҳақида билмаган бўлсалар-да, сутли ванна қабул қилган, сочларини ювган ва ушбу маҳсулотни абадий ёшлик сири деб билган».

Стилист Ричард Мэриннинг айтишича, у мижозларига сочларини сут билан ювишни тавсия қилган. Унга амал қилганлар сочларини силлиқ ва ялтираганини билдирган. Ушбу натижани қуйидаги боғлиқлик асосида тушуниш мумкин: кератиндан ташкил топган соч толалари бу оқсил демак, шунинг сингари сутда ҳам оқсил миқдори кўп бўлади. Сутда соч ювилганда соч бўялиши, дазмол қилиниши ва бошқалар натижасида юзага келган бўшлиқларни оқсил билан тўлдиради.

Шу сабаб ҳам соч учун сутли ниқоблар қилишни унутмаслик керак. Бундай ниқоб бош териси, сочлар мустаҳкамлиги ва эластиклигига фойда беради. Энг оддий қилиниши мумкин бўлган ниқоб сут ёки қатиқни ювилмаган сочга суртиш, шундан кейин бош терисини уқалаш ҳисобланади. Бошни целлофан ҳамда унинг устидан сочиқ билан ўраб, 30 дақиқадан кейин ювиб ташлаш керак.

Жинжер Кинг — кимёгар, косметик воситалар ишлаб чиқарувчи: «Альфагидроксикислотага бой ҳисобланган сут терининг ўлик ҳужайралар қатламини йўқ қилиб, уни текислаш, рангини яхшилаш, ажинларни камайтириш хусусиятига эга. Макияжни тозалагандан кейин юзингизни сут билан ювишни тавсия қиламан».

Дерматолог Эми Бродскининг айтишича, энг яхши табиий ингредиентлардан бири бўлган сут қуруқ ва сувсизланган тери учун айни муддао. У терини юмшатиш, текислаш ва тинчлантириш хусусиятига эга. Шу сабаб ҳам Эми беморларга муолажа сифатида сутли маҳсулотлар: сметанадан тайёрланган ниқоб, сут билан юзни ювиш, йогурт ва мевалардан қўшиб тоник коктейл тайёрлашни тавсия қилади. Натижа эса кимёвий моддалар қўшилган воситалар ишлатилганидан кўра ижобий бўлади.

Манба: Daryo.uz “Замин” янгиликларини “Facebook”да кузатиб боринг