Андижонда 12 қаватли уй колоннаси қийшиқлиги аниқланиб, қурилиш ишлари тўхтатилди

Андижонда 12 қаватли уй колоннаси қийшиқлиги, аҳоли хонадонларидан 4 метр масофа сақлаган ҳолда қурилаётгани аниқланди. Бу ҳақда мурожаат ижтимоий тармоқларда эълон қилингач, вилоят Қурилиш ва уй-жой коммунал хўжалиги соҳасида ҳудудий назорат инспекцияси томонидан ўрганиш ишлари олиб борилди.

Ўрганиш натижаларидан маълум бўлишича, Андижон шаҳар қурилиш бўлимининг 2021 йил 26 мартдаги рухсатномаси билан қурилиши тугалланмаган бинони бузиб, ўрнига кўп қаватли турар жой қуриш учун рухсат берилган.

Кенгаш хулосасида ҳудудий ёнғинга қарши назорат хизмати томонидан юқоридаги лойиҳа ҳужжати талабларга мувофиқ ишлаб чиқилган, деб келишилган. 12 қаватли турар жой биноси билан якка тартибдаги уй-жой биноси оралиқ масофаси 4-8 метргача сақланган ҳолда лойиҳаланган ҳамда “Шарқ Строй Эксперт” МЧЖ томонидан экспертиза хулосаси берилган.

Юқоридаги ҳолатлар юзасидан вилоят қурилиш бош бошқармасига Архитектура ва шаҳарсозлик кенгаши ишчи органининг 2021 йил 5 июлдаги хулосаси нотўғри берилгани сабабли 2022 йил 10 августда инспекция томонидан тақдимнома (камчиликларга йўл қўйган масъулларга белгиланган тартибда чора кўриш, лойиҳа ташкилотини лицензиясини бекор қилиш ҳамда берилган АШК хулосасини бекор қилиш) киритилган.

Бош бошқарма ҳудудий инспекциянинг тақдимномасига 2022 йил 23 август куни йўллаган жавоб хатида объект қурилишини инспекция томонидан вақтинчалик тўхтатиб туриш лозимлиги ва йўл қўйилган камчиликлар юзасидан лойиҳа ташкилоти раҳбаридан тушунтириш хати олингани билдирилган.

Инспекция томонидан ўтказилган назорат ишлари давомида мазкур кўп қаватли турар жой биносининг Б-блоги 3-қавати “1-Г” ўқидаги юк кўтарувчи устун (колонна) конструкцияси вертикалликдан 50-70 миллиметрга оғганлик ҳолати ҳам аниқланган.

Ҳолат юзасидан инспекция томонидан 2023 йилнинг 23 июнида қурилишни тўхтатиш тўғрисида ёзма кўрсатма берилиб, қурилиш ишлари тўхтатилган.

Объектда аниқланган қоидабузарликлар юзасидан буюртмачининг техник назорати, лойиҳачининг муаллифлик ҳамда пудратчининг ички назорати ходимларига Маъмурий жавобгарлик тўғрисидаги кодекснинг 99-моддаси (шаҳарсозлик тўғрисидаги қонунчиликни бузиш) 1-қисми билан маъмурий жарима қўллаш учун ҳужжатлар расмийлаштирилган.