Тошкентнинг Янгиҳает туманида чақалоқ сумкага солинган ҳолда кўчага ташлаб кетилди. Унга биринчи тиббий ёрдам кўрсатилиб, шифохонага олиб борилди. Ҳолат юзасидан текширув ишлари ўтказилмоқда.
Тошкент шаҳри Янгиҳает туманида 15 январ куни тонгги соат 7:30 да кўчадан чақалоқ топиб олинди. Бу ҳақда “Millar” хабар берди.
Бозор халта ичига солинган чақалоқни кўп қаватли уйда яшовчи фуқаро топиб олган ва у дарҳол тез ёрдам ҳамда ички ишларга қўнғироқ қилган.
“Биз туманнинг Йўлдош-15 даҳасида яшаймиз. Бу кўчадаги камералар икки йилдан бери ишламайди. Агар улар ишлаганида гўдакни ким ташлаб кетганини дарҳол аниқлаган бўлардик”, — дейди мурожаатчилардан бири.
Маълум қилинишича, тез тиббий ёрдам ходимлари воқеа жойига етиб келиб, чақалоққа биринчи ёрдам кўрсатган ва у 13-сонли шаҳар шифохонасига олиб кетилган.
“Биз чақирув жойига борганимизда оқ сумкага қизил адёлга ўралган ҳолда янги туғилган қиз чақалоқ ташлаб кетилгани аниқланди. Унинг киндиги ноодатий тарзда кесилган. Туғилганига бир ёки ярим соат бўлган”, — деб таъкидлади тез тиббий ёрдам шифокори Умар Одилов.
Айни пайтда чақалоқ шифокорлар назорати остида. Боланинг аҳволи барқарор деб баҳоланмоқда.
“Одамлар бефарқ бўлмасдан, дарҳол тегишли органларга хабар берганидан хурсандмиз”, — дейди шифокор.
ИИВ ЖХД ахборот хизмати ходими Сўҳроб Шомансурувнинг қайд этишича, ҳозирда ҳолат юзасидан Янгиҳает тумани ички ишлар органи фаолиятини мувофиқлаштириш бўлими томонидан терговга қадар текширув ҳаракатлари олиб борилмоқда. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар
