Зелимхон Ҳайдаров Теннис федерацияси раиси ўринбосари этиб тайинланди

^{Фото: Президент матбуот хизмати}
Зелимхон Ҳайдаров Ўзбекистон теннис федерацияси раиси ўринбосари этиб тайинланди. Бу ҳақда федерация матбуот хизмати хабар берди.

Зелимхон Ҳайдаров 23 йил (1993−2016 йиллар) Ўзбекистоннинг биринчи президенти Ислом Каримов девонининг раҳбари лавозимида фаолият юритган, кейинчалик Президент администрациясида (2016−2018) ҳам шу лавозимда ишлаган. 2018 йил август ойидан Президент администрациясининг Молия-иқтисодиёт бўлими мудири лавозимида ишлаб келаётган эди.

2019 йилдан буён федерация бош котиби лавозимида ишлаб келаётган Ирода Тулаганова ҳам раис ўринбосари этиб тайинланди.

Ирода Тулаганова — Ўзбекистонда хизмат кўрсатган спортчи, етти карра WТА турнири ғолиби. «Шуҳрат» медали ва «Ўзбекистон ифтихори» кўкрак нишони соҳиби.

Буюк Келажак компаниясида эксперт ҳамда Давлат инвестиция қўмитаси методология бўлимининг Тошкент шаҳридаги бош мутахассиси лавозимларида ишлаган Нумон Саттаров ва Азиз Ҳамидов ҳам Теннис федерацияси раҳбарининг ўринбосарлари этиб тайинланди.

Сардор Камилов эса ташкилотнинг янги бош котиби лавозими эгаллади.

Эслатиб ўтамиз, 17 феврал куни «Капиталбанк» асосчиси, «Пахтакор» футбол клубининг собиқ президенти Ботир Раҳимов Ўзбекистон теннис федерациясига раис этиб сайланган эди. “Замин” янгиликларини “Telegram”да кузатиб боринг