Хоразмда цистерна тозалаётган йигит ҳалок бўлди

27 март куни Хоразм вилояти Шовот туманида ёш йигит бензин цистернасини тозалаётган пайтда ҳалок бўлди, деб Nova24.uz хабар берди.

Ҳодиса тумандаги ёқилғи қуйиш шохобчаларидан бирида содир бўлган. Заправка ходими ўз танишидан 10 тонналик цистернанинг ички қисмини тозалашни сўрайди. У иш ҳақини кейинроқ тўлашини айтади. Шундан сўнг фуқаро ўғли (2004 йилда туғилган) билан бирга АЗСга йўл олади.

Тозалаш вақтида 19 ёшли йигит цистерна ичига тушади. Аммо иш жараёнида бензин қолдиқларидан чиққан буғлардан заҳарланиб, ҳушидан кетади. Буни кўрган отаси уни қутқариш учун пастга тушади, аммо ўзи ҳам ҳушидан кета бошлайди.

Шунда эркакнинг укаси етиб келиб, уни кийимидан тортиб чиқаради. Афсуски, ёш йигитни қутқариб қолиб бўлмайди ва у ҳалок бўлади.

Маълум бўлишича, эркак ва унинг ўғли бунгача АЗСдаги резервуарларни тўрт марта тозалашган ва ҳар гал учун 100-150 минг сўмдан пул олишган. “Замин” янгиликларини “Telegram”да кузатиб боринг