Ўзбекистонда 3 ойда 100 мингдан ортиқ шахсга маъмурий жазо қўлланди

Олий суд матбуот хизмати маълум қилишича, жорий йилнинг биринчи чораги давомида Ўзбекистонда маъмурий ҳуқуқбузарликларга оид 138 557 та иш судлар томонидан кўриб чиқилди. Бу ишлар 162 665 нафар шахсга тааллуқли бўлиб, улардан 105 418 нафарига маъмурий жазо тайинланди.

Эътиборга молик рақамлар:
– Ярашгани сабаб 19 201 нафар шахс жавобгарликдан озод этилди
– Апелляция тартибида 1 924 нафар шахсга оид 1 632 та иш кўриб чиқилди
– Кассация босқичида эса 2 540 нафар шахс бўйича 2 380 та иш кўрилди

Кўрилган ишларнинг катта қисмини қуйидаги ҳуқуқбузарликлар ташкил этган:
– майда безорилик;
– ички ишлар органлари талабини бажармаслик;
– лицензиясиз йўловчи ташиш;
– энергия ресурсларидан фойдаланиш қоидаларини бузиш;
– ҳақорат ва жамоат жойида алкогол истеъмоли;
– йўл ҳаракати қоидаларини бузиш;
– маст ҳолда транспорт бошқариш;
– совуқ қурол ёки унинг ўрнини босувчи ашёларни олиб юриш.

Шунингдек, биринчи инстанция судлари чиқарган қарорлардан кассацияда 1 021 та бекор қилиниб, 625 таси ўзгартирилгани қайд этилди. «Замин»ни Telegram’да ўқинг!