Италия бош вазири Ўзбекистонга ташриф буюради: Самарқандда муҳим учрашувлар бўлиб ўтади

Италия ҳукуматининг расмий веб-сайтида маълум қилинишича, мамлакат бош вазири Жоржиа Мелони 25–26 апрель кунлари Ўзбекистонга ташриф буюради. Мазкур юқори даражадаги ташриф доирасидаги учрашувлар Самарқанд шаҳрида ташкил этилади.

Қайд этилишича, бу ташриф Мелонининг Марказий Осиё давлатларига қилган сафарининг бир қисми бўлиб, мазкур ташрифлар минтақадаги мамлакатлар билан Италия ўртасидаги муносабатларни янада кенгайтириш ва мустаҳкамлаш мақсадида амалга оширилмоқда.

Аввалроқ Италия бош вазири Жоржиа Мелонининг 26–27 апрель кунлари Қозоғистон президенти Қосим-Жўмарт Тўқаевнинг таклифига биноан Қозоғистонга ҳам ташриф буюриши ҳақида маълум қилинган эди.

Қозоғистон президенти матбуот хизмати — Оқўрда маълумотига кўра, юқори даражадаги музокаралар давомида икки мамлакат ўртасидаги стратегик шериклик муносабатларини янада мустаҳкамлаш ҳамда ҳамкорликни кенгайтириш истиқболлари муҳокама қилинади.

Шунингдек, Италия раҳбари 27 апрель куни Остона шаҳрида ўтказиладиган биринчи «Марказий Осиё – Италия» саммитида иштирок этади. Мазкур саммитда Марказий Осиё мамлакатлари билан Италия ўртасидаги кўп томонлама муносабатларни янада ривожлантириш, иқтисодий ҳамкорлик, энергетика ва бошқа соҳалардаги алоқаларни кенгайтириш масалалари кўриб чиқилади.

Ушбу юқори даражадаги тадбирларда қандай келишувларга эришилиши ва музокаралар қандай натижалар билан якунланиши кўпчиликда катта қизиқиш уйғотмоқда. «Замин»ни Telegram’да ўқинг!