Самарқанддан йўловчи сифатида йўлга чиққан икки ёш йигит бутун мамлакат бўйлаб муҳокамага сабаб бўладиган воқеага қўл урди. Улар нафақат машина ўғирлаб қўйди, балки ўз йўлига тўсқинлик қилган ички ишлар ходимини пичоқлаб, бошқа транспорт воситасини ҳам олиб қочди.
Ҳодиса 2025 йил 2 август куни содир бўлган. Андижон вилояти Хўжаобод туманида истиқомат қилувчи 18 ёшли Ф.Ш. ва Ф.Х. исмли йигитлар Самарқанддан Наманганга етиб олиш мақсадида йўловчи сифатида Cobalt’га ўтиришади. Сирдарё вилояти ҳудудида ҳайдовчи ҳожатхонага тушганидан фойдаланиб, улар машинани олиб қочади.
Орадан кўп ўтмай, Сирдарё вилояти ИИБ 102 хизматига ушбу ўғирлик ҳақида хабар тушади. Барча постлар ва ЙПХ инспекторлари огоҳлантирилади. Аммо йигитлар давлат рақамини ечиб, изларини йўқотишга ҳаракат қилади.
Бўка блок-постида ЙПХ инспектори Cobalt’ни тўхтатади, бироқ ҳайдовчи ҳужжатларни кўрсатгандан сўнг, иккинчи йўлакдан машинани ҳайдаб, ҳеч ким кутмаган томонга йўл олади.
Энг ёмони эса шундаки, Бўка тумани ИИБ жиноят қидирув бўлими ходими Н.Ш. йигитларни тўхтатишга уринаётган пайтда, улардан бири унинг бўйнига пичоқ билан ҳужум қилади. Шундан сўнг, Cobalt’ни қолдириб, ходимнинг Matiz’ини ҳайдаб кетишади.
Бу билан ҳам чекланишмайди — Тошкент вилоятининг Оҳангарон туманида ЙПХ инспектори Х.Д. уларни тўхтатмоқчи бўлади. Лекин йигитлар унга ҳам бўйсунмай, машинани унга ҳайдаб юборишади. Инспектор жароҳат олиб, шифохонага ётқизилади.
Тезкор суриштирув ишлари самарасида гумонланувчилар Оҳангарон шаҳри ҳудудида қўлга олинади.
Ҳозирда уларга нисбатан Жиноят кодексининг 267-моддаси — транспорт воситасини ўғирлаш ва бошқа қўшимча моддалар бўйича иш қўзғатилган. Қонунга кўра, бундай жиноят учун 5 йилдан 20 йилгача озодликдан маҳрум қилиш жазоси белгиланган.
Ушбу воқеа жамоатчиликни ҳушёр бўлишга, хавфсизликка жиддий ёндашишга чорламоқда. Чунки бу фақат машина ўғирлаш эмас, балки ҳаёт учун хавф солувчи жасоратсизликнинг намунасидир.
«Замин»ни Telegram’да ўқинг!
