Фарғона вилоятида содир бўлган қотилликка суиқасд жинояти маҳаллий аҳоли орасида катта шов-шувга сабаб бўлди. Маълумотларга кўра, 24 ёшли йигит собиқ севгилисининг яқин қариндошига пичоқ билан ҳужум қилиб, уни ўлдиришга уринган.
Ҳодиса Бувайда туманида юз берган. Суд маълумотларига кўра, ёш йигит жиноятга олдиндан тайёргарлик кўрган: машинасига совуқ қурол — пичоқни олдиндан жойлаштириб қўйган. Собиқ севгилиси аллақачон турмуш қурганига қарамасдан, айбланувчи у билан алоқани узмаган. Бу ҳолатдан қизнинг турмуш ўртоғи ва унинг қариндошлари хабардор бўлганидан сўнг, тарафлар орасида кескин можаро келиб чиққан.
Қизнинг қариндошлари ва эри йигитни учрашувга чақирган. Бир қарашда оддий суҳбат сифатида бошланган учрашув бир неча дақиқа ичида қаттиқ жанжалга айланди. Асаблар дош бермаган йигит машинасига югуриб бориб, олдиндан олиб келган пичоқни олган ва эркакка бир неча марта зарба берган. Пичоқ жароҳатлари жабрланувчининг кўкрак, сон ва ошқозон қисмига етган.
Жабрланувчи ҳаётини можаронинг бошқа иштирокчилари ўз вақтида кўрсатган ёрдам сақлаб қолган. Агар ёрдам кечикканида, воқеа ўлим билан якунланиши эҳтимоли жуда юқори эди.
Суд жараёнида аниқланишича, айбланувчи ҳаракатларини олдиндан режалаштирган. Шу сабабли унга нисбатан Ўзбекистон Республикаси Жиноят кодексининг 25 ва 57-моддалари (одам ўлдиришга тайёргарлик ва унга суиқасд қилиш) қўлланилиб, 97-модда асосида айбдор деб топилди.
Суд ҳукмига кўра, йигит саккиз йил муддатга умумий режимли колонияда озодликдан маҳрум этилди. У жазосини тўлиқ ўташ учун колонияга жўнатилди.
Маҳаллий фуқаролар бу воқеадан қаттиқ таҳликали хулоса чиқаришмоқда: ҳиссиётга берилган бир лаҳза инсон тақдирини бутунлай ўзгартириши мумкин.
«Замин»ни Telegram’да ўқинг!
