12 август куни Самарқанд вилоятининг Ургут туманида йирик йўл-транспорт ҳодисаси қайд этилди. Вилоят Йўл ҳаракати хавфсизлиги бошқармаси маълумотларига кўра, “Мерганча” маҳалласи ҳудудида МАЗ ва MAN русумли юк машиналари тўқнашган ва ҳар икки транспорт воситаси ағдарилиб кетган.
Тезкор маълумотларга қараганда, воқеа соат 10:20 атрофида содир бўлган. МАЗ ҳайдовчиси ички йўлдан “Камангарон – Мерганча” йўналишида ҳаракатланаётган пайтда олдинда келаётган MAN русумли юк машинасининг орқа қисмига келиб урилган. Айни пайтда терговчилар дастлабки версия сифатида юк машиналаридан бирининг тормози ишламай қолганини билдиришмоқда.
Авария оқибатида ҳайдовчилардан бири шифохонага олиб кетилган, бироқ расмий маълумотларга кўра, ҳеч ким жиддий тан жароҳати олмаган. ЙҲХБ ҳодиса юзасидан дастлабки суриштирув ишларини бошлаб юборган.
Маҳаллий фуқаролар айтишича, тўқнашув жойи йўл ҳаракати зич бўладиган ҳудуд ҳисобланади ва бундай вазиятлар эҳтиётсизлик ҳамда техник носозликлардан келиб чиқиши мумкин. Мутасаддилар эса юк машина ҳайдовчиларини тезликка риоя қилиш, транспорт воситалари техник ҳолатини доимий текшириб туриш ва узоқ йўл олдидан махсус профилактик кўрикдан ўтказиш зарурлиги ҳақида яна бир бор огоҳлантирмоқда.
«Замин»ни Telegram’да ўқинг!
