Жорий йилнинг биринчи ярмида мамлакатимизда аёл-қизларга нисбатан тазйиқ ва зўравонлик ҳолатлари кескин кўпайди. Олий Мажлис Сенати матбуот хизмати маълумотига кўра, ўтган йилнинг шу даврига нисбатан бу кўрсаткич 121 фоизга ошган.
Сенатнинг Ёшлар, хотин-қизлар, маданият ва спорт масалалари қўмитаси аъзоси Малика Қодирхонова ушбу ҳолат юзасидан Оила ва хотин-қизлар қўмитаси раиси Зулайхо Маҳкамова номига сенатор сўрови йўллади. Унга кўра, мақсад — хотин-қизлар ҳуқуқларини ҳимоя қилиш ва зўравонликни олдини олиш бўйича амалга оширилаётган ишлар самарадорлигини ўрганиш.
Рақамлар ортидаги ҳолат
Республика бўйича 2024 йилнинг биринчи ярмида 48 303 та зўравонлик ва тазйиқ ҳолати қайд этилган. Бу ўтган йилнинг шу давридаги кўрсаткичдан икки баравар кўп. Энг кўп ҳолатлар Тошкент вилоятида — 9 414 та, Бухорода — 5 612 та, Қашқадарёда — 5 268 та ва Андижон вилоятида — 4 808 та бўлган. Шу даврда 930 нафар аёлга такрорий ҳимоя ордерлари берилган.
Сенатор ташаббуси
Малика Қодирхонова ўз сўровида қўмита ва унинг ҳудудий бўлинмаларига бир қатор саволлар йўллаган. Жумладан, тазйиқ ва зўравонликка олиб келадиган сабабларни аниқлаш, профилактика ишларини кучайтириш, ваколатли органлар билан ҳамкорликни ривожлантириш ва маҳаллаларда бундай ҳолатларга нисбатан муросасизлик муҳитини яратиш бўйича кўрилаётган чоралар ҳақида асосланган маълумот талаб қилинган.
Мутахассислар фикри
Таҳлилчиларга кўра, қонунлар ва ҳуқуқий механизмлар мавжуд бўлишига қарамай, муаммонинг авж олиши жамиятдаги айрим ижтимоий, психологик ва иқтисодий омиллар билан боғлиқ. Улар нафақат жазо чораларини кучайтириш, балки таълим, тарғибот ва ёрдам марказларини кенгайтириш ҳам муҳим эканини таъкидлашмоқда.
«Замин»ни Telegram’да ўқинг!
