Ўзбекистонда қонунга хилоф равишда қимор ва букмекерлик хизматларини тарғиб қилган икки блогер маъмурий жавобгарликка тортилиб, уларнинг иши судга оширилди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси маълум қилди.
Текширув натижаларига кўра, бир неча юз минглаб обуначига эга блогерлар ўз саҳифаларида букмекерлик хизматларини тарғиб қилувчи постлар ва видеороликлар жойлаштирган. Хусусан, “Melbet” бренди иштирокидаги контент ҳамда қимор ўйинларини тарғиб қилувчи саҳна кўринишлари фуқаро Амирхон Ўткир ўғли Шамсиддинов (amirxon_uzbek) ва Дониёр Маъруф ўғли Илёсовга (donik_krash) тегишли экани аниқланган.
Маъмурий иш юзасидан ҳужжатлар белгиланган тартибда расмийлаштирилиб, судга юборилди.
Маълумот учун, “Реклама тўғрисида”ги қонуннинг 46-моддасига мувофиқ, Ўзбекистонда қимор ва таваккалчиликка асосланган ўйинларни реклама қилиш қатъиян тақиқланади. Бундай фаолият учун маъмурий ёки жиноий жавобгарлик белгиланган. Мутасаддилар бу каби ҳолатлар интернет муҳитида назоратни янада кучайтириш зарурлигини таъкидлашди.
«Замин»ни Telegram’да ўқинг!
